Լուրեր
Մարդիկ փոքր քայլերին թերահավատորեն են մոտենում, փոսից դուրս գալու ցատկային ակնկալիք ունեն․ Շիրակի մարզպետ
  • 18:30
  • 2019-05-21
  • Դիտումներ՝ *

Գյումրիում փողոցաշինության ծրագիր է իրականացվում: Գյումրեցիները պնդում են, որ փողոցները քանդված են, բայց շինարարական աշխատանքները ակտիվ չեն: Կա գումարը՝ ֆինանսավորումը, այդ դեպքում որտե՞ղ են խնդիրները. շինարարական, վարչարարական, մարդկային ռեսուրսների՞ խնդիր է:

Պատասխանելով «Առաջին լրատվական»-ի այս հարցերին՝ Շիրակի մարզպետ Տիգրան Պետրոսյանը մասնավորապես ասաց. «Մենք ունենք գումար, շինարար, պատվիրող, նախագծող, վերահսկող, գումարած՝ հանրային բողոք, երկարացված ժամկետներ և անցորդների ու վարորդների անվտանգության համար մեծ թվով խնդիրներ: Իսկապես խնդիր կա, և ամենամտահոգող գործոնը, ըստ էության, ժամանակի հետ էր կապված:

Փողոցաշինությունը ունի առանձնահատկություն. մինչև չքանդես, չես շինի: Երբ որ ժամանակի մեջ այս քանդված փողոցները մնացին, և մարդիկ տեսան, որ այնտեղ պարզապես որևէ գործառույթ չի իրականացվում, դա թե՛ մեծ թվով անհարմարություններ, թե՛ ռիսկեր առաջացրեց, և վերջում՝ նաև հանրային դժգոհություն:

Հիմա մենք սկսել ենք համատեղ աշխատել քաղաքաշինության կոմիտեի, քաղաքապետարանի հետ: Անցած շաբաթ հանդիպում ունեինք շինարարների հետ, այս շաբաթ արդեն Գյումրիում մեծ խորհրդակցություն է լինելու, հստակեցվելու են ավարտական ժամկետները: Խնդիրները կապված են եղել թե՛ շինարարական նորմերի հետ, թե՛ բազալտե եզրաքարերի չափորոշիչների և ստանդարտների, տարբեր կոմունալ ծառայությունների հետ»:

«Կոնցեպտուալ մոտեցում կա՝ Գյումրիի առնվազն կենտրոնում՝ Շիրազի փողոցի հետ կապված ծրագիրը ավարտել հունիսի 30-ին. դա օրակարգային հարցերից է: Մյուս փողոցներում էլ՝ արդեն շինարար-շինարար, դեպք առ դեպք բացահայտել այն մոտեցումներն ու խնդիրները, որոնք բերել են այսօրվա վիճակին, և գտնել լուծումների ուղիները:

ՀԿ-ներից մեկի կողմից նաև մոնիտորինգ էր իրականացվել, որտեղ բացահայտվել էին թերություններ, որոնց հիման վրա քրեական գործ է հարուցվել»,- մանրամասնեց Շիրակի մարզպետը:

 

  • Դիտումներ՝ *