Այսօր Կրթության և գիտության նախարարությունում նախարար Արայիկ Հարությունյանը դիպլոմներ է հանձնել օլիմպիադաների հանրապետական փուլում հաղթած աշակերտներին: Նշենք, որ 2018-2019 ուսումնական տարվա դպրոցականների օլիմպիադաներին մասնակցել է 57 000 աշակերտ:
Ի դեպ, դպրոցական օլիմպիադաներ կազմակերպվում են 16 առարկայից, որոնցից մաթեմատիկա, ֆիզիկա, քիմիա, կենսաբանություն, աստղագիտություն, ինֆորմատիկա և աշխարհագրություն առարկաներից մեր սովորողները մասնակցում են նաև միջազգային օլիմպիադաների: Իսկ միջազգային օլիմպիադաներին մասնակցող թիմերը կազմվում են հանրապետական փուլի հաղթողներից:
Այս տարի 16 առարկայից հանրապետական փուլի մասնակցել է 1568 աշակերտ: Նրանցից 201-ն արժանացել է երրորդ կարգի, 114-ը՝ երկրորդ կարգի, իսկ 72-ը՝ առաջին կարգի դիպլոմի:
Դիպլոմների հանձմանը ներկա են եղել նաև աշակերտների ծնողները: Դիպլոմների հանձնման արարողությունից հետո նախարարը լուսանկարվել է աշակերտների և նրանց ծնողների հետ: