Լուրեր
Լավ կլիներ, եթե հանրապետության նախագահը նման անդեմ հայտարարությամբ հանդես չգար․ Նաիրա Զոհրաբյան
  • 15:15
  • 2019-05-21
  • Դիտումներ՝ *

«Նիկոլ Փաշինյանի հայտարարության մեջ, իհարկե, կային ընդունելի առաջարկներ, որոնց մասին խոսել է նաև «Բարգավաճ Հայաստանը»: Բայց ես մի բան չեմ հասկանում՝ ինչո՞ւ նախորդ օրը ուղղակի հակասահմանադրական գործողության կոչ արվեց, և ինչո՞ւ ուղղակի հարված հասցվեց Հայաստանի միջազգային հեղինակությանը»,- «Առաջին լրատվական»-ի հետ զրույցում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը՝ նկատի ունենալով դատարանների մուտքերն ու ելքերը արգելափակելու վարչապետ Փաշինյանի կոչը:

Նրա խոսքով՝ առանց այդ հակասահմանադրական կոչի կարելի էր անել այն հայտարարությունը, ինչը արվեց երեկ. «Այո, քննել դատավորների ունեցվածքը, փորձել հասկանալ՝ արդա՞ր են եղել վճիռները, թե՞ ոչ»:

Ինչ վերաբերում է նախագահ Արմեն Սարգսյանի հայտարարությանը, Նաիրա Զոհրաբյանը նշեց. «Ես ցավում եմ, որ Սահմանադրությամբ՝ երկրի անվտանգության երաշխավոր նախագահը հանդես է գալիս ոչինչ չասող հայտարարությամբ: Նախագահի հայտարարությունը ես համարում եմ առ ոչինչ, որովհետև բացի շատ ընդհանուր, շատ վախվորած, շատ զգուշավոր ձևակերպումներից՝ որևէ այլ բան չկար: Շատ ավելի լավ կլիներ, եթե հանրապետության նախագահը նման անդեմ հայտարարությամբ ընդհանրապես հանդես չգար»:

Մեր զրուցակցի կարծիքով՝ գործող իշխանությունը մտածելու բան ունի, երբ վարչապետի կոչին՝ երկրորդ հեղափոխության մեկնարկի վերաբերյալ, արձագանքում է ընդամենը 1100 մարդ՝ մեկ տարի առաջվա 100 հազարավորի փոխարեն. «Սակայն եթե արձագանքեին ոչ թե 1100 մարդ, այլ հարյուր հազարավորներ, ապա երկրում կարող էր ստեղծվել անկանխատեսելի և վտանգավոր իրավիճակ. այդ դեպքում ո՞ւր էր հանրապետության նախագահը»:

 

Մանրամասն՝ տեսանյութում:

  • Դիտումներ՝ *