Ախալքալաքի Կարծախի գյուղում գիշերը հարձակվել են պահակի վրա և գոմից 32 գլուխ խոշոր եղջերավոր կենդանի գողացել: Սահմանապահները կարողացել են կենդանիներին վերադարձնել մինչև Թուրքիայի սահմանը հատելը, կողոպտիչները հասցրել են թաքնվել, հայտնում է Jnews-ը:
Թուրքիային սահմանակից Կարծախի գյուղում ավազակային հարձակումն ու գողությունը տեղի է ունեցել ժամը 1:00-ի սահմաններում: Գոմի պահակ Սարգիս Գասպարյանի խոսքերով՝ ինքը հեռախոսով որդու հետ էր խոսում, հետո աղմուկ և շան հաչոցը լսելով՝ բացել է վագոն-տնակի դուռը, որտեղ գիշերում է: Վատ բան զգալով՝ վերադարձել է և դուռը փակել: Կողոպտիչները շանը սպանել էին կրակոցով, հետո կոտրել էին վագոնի դուռը և ներս մտել:
«Մտան և պահանջեցին հեռախոսս: Ես վրացերեն ասացի, որ չեմ տա, իսկ նա թուրքերեն ասում է՝ ոնց չես տա եւ հարվածեց ինքնաձիգի կոթով: Ես հասցրեցի հեռախոսս մի կողմ նետել: Հետո ինչ-որ բան ցողեցին աչքերիս, մտավ երկրորդը, եւ սկսեցին կապկպել թեւերս: Կապեցին պարանով և ձեռնաշղթա հագցրին, բերանս փակեցին և գնացին: Նրանք զինվորական համազգեստով էին: Վստահ եմ, որ վրացերեն գիտեին, թուրքերեն ակցենտով էին խոսում: Ես թուրքերեն մի քիչ հասկանում եմ»,- ասել է Սարգիս Գասպարյանը:
Կողոպտիչների գնալուց հետո Սարգիս Գասպարյանը դժվարությամբ քանդել է կապերը, բայց ձեռնաշղթաները մնացել են ձեռքերին: Նա բացել է դուռը և վազել դեպի տիրոջ տուն: Նրա խոսքերով՝ սկսել է գլխով հարվածել պատուհանին՝ մինչև արթնացրել է մարդկանց:
Գոմի և կենդանիների տերը՝ Ատոմ Օգմրցյանը, անմիջապես ոստիկանություն է զանգահարել, հետո գնացել է սահմանապահ ուղեկալ:
«Ինձ ուղեկալում ասացին, որ երբ ես 1:43 զանգեցի, նրանք 1:32 արդեն տեսել էին, որ անասունը տեղափոխում են: Ասում են, որ 4 մարդ կար: Փոխհրաձգություն էր եղել, եւ կողոպտիչները չէին կարողացել տանել անասունը, բայց փախել էին, սահմանապահները չէին կարողացել բռնել նրանց»,- ասում է Ատոմ Օգմրցյանը:
Ատոմ Օգմրցյանը եւ գյուղացիները վրդովված են: Սա սահմանամերձ գյուղերում անասունի գողության առաջին դեպքը չէ, իսկ Օգմրցյանի համար սա 3-րդ դեպքն է:
Վրաստանի ՆԳՆ-ն Կարծախիում կատարվածի փաստով ՔՕ 179-րդ հոդվածով հետաքննություն է սկսել: