Ադրբեջանի արտգործնախարար Էլմար Մամեդյարովը մայիսի 14-ին Բրյուսելում հայ լրագրողների հետ տեղի ունեցած զրույցի ընթացքում խոսել էր Հայաստանի նկատմամբ Ադրբեջանի և Թուրքիայի կողմից իրականացվող շրջափակման քաղաքականության մասին և ավելացրել, թե շուտով կփակվի նաև Հայաստանի երրորդ հարևանի հետ սահմանը: Մամեդյարովի այս հայտարարությունը անմիջապես գրավեց փորձագիտական համայնքի ուշադրությունը: Շատերը՝ ոչ միայն Հայաստանում, այլև արտերկրում, փորձեցին վերլուծել ադրբեջանցի դիվանագետի այս հայտարարությունը, հասկանալ՝ նա քարոզչությո՞ւն է անում, սպառնո՞ւմ է, փորձում է խուճա՞պ առաջացնել Հայաստանում, թե՞ ենթադրություն կամ կանխատեսում է անում, որոշակի տեղեկություն է հաղորդում:
Այն վերլուծաբանները, որոնց հետ հասցրել ենք զրուցել այս օրերին, այդ թվում՝ վրացի, ռուսաստանցի փորձագետները, հակված են այն մտքին, որ Ադրբեջանի արտգործնախարարն ամենայն հավանականությամբ նկատի է ունեցել Իրանի շուրջ ստեղծված լարված իրավիճակը, ԱՄՆ-Իրան դիմակայությունը, որը կարող է հանգեցնել անկայունության տարածաշրջանում՝ ազդելով նաև Իրանի հարևան Ադրբեջանի և Հայաստանի վրա:
Պրահայի «Ազատություն» ռադիոկայանի «Էխո Կավկազա» ծառայության քաղաքական մեկնաբան Վադիմ Դուբնովը ևս հակված է այս վարկածին: «Առաջին լրատվական»-ի հետ զրույցում Դուբնովը նշեց հետևյալը. «Չկա որևէ օբյեկտիվ նշան, որը կհուշի, թե վտանգ է կախված հայ-վրացական սահմանի վրա, բայց, հնարավոր է, Ադրբեջանի արտաքին գործերի նախարարը նկատի ունի սահմանը Իրանի հետ: Խոսքը ԱՄՆ պատժամիջոցների մասին է, որոնց, Մամեդյարովի ենթադրությամբ, Միացյալ Նահանգները կառաջարկի միանալ Երևանին: Բայց ես այս սցենարը լուրջ չեմ համարում: Միացյալ Նահանգները Իրանի դեմ իր նախապատրաստություններում միշտ էլ նրբանկատություն է ցուցաբերել, այդ թվում, իմիջիայլոց, Բաքվի նկատմամբ՝ վերջինիս անհարմար վիճակի մեջ չդնելով և չփորձելով վատթարացնել Ադրբեջանի և Իրանի՝ առանց այդ էլ բարդ հարաբերությունները: Իսկ Հայաստանի հանդեպ առավել ևս նման մոտեցում չի ցուցաբերի: Կարծում եմ, որ (ԱՄՆ) նույնիսկ ներկայիս վարչակազմն է հասկանում, որ չարժե նմանատիպ ճնշմամբ փորձության ենթարկել Երևանին»:
