Այսօր հրավիրված մամուլի ասուլիսի ընթացքում հայտնի գործարար Միխայիլ Բաղդասարովը դժվարացավ գնահատել Հայաստանի սոցիալ-տնտեսական վիճակի մասին և նախընտրեց խոսել իր բիզնեսների մասին:
Նրա խոսքերով՝ ցեմենտը արտադրվում է գրեթե նախորդ տարվա ծավալներով։ Ադրադառնալով ցեմենտի թանկացմանը՝ Մ.Բաղդասարովը նշեց, որ ինքնարժեքը գոյանում է գազի, էլեկտաէներգիայի, աշխատողների վարձավճարների գումարներից։ Սակայն հիմա արտադրամասը մոդեռնացվում է, ինչի արդյունքում տեխնիկական ծախսերը կկրճատվեն, և գներն էլ որոշ չափով կնվազեն։
Շինարարությունը նույնպես ընթանում է նախորդ տարվա ծավալներով։ Ինչ վերաբերում է բենզինին՝ նա նշեց, որ բենզինի շուկայում իրենք լիդեր չեն, այլ գրավում են 3-րդ տեղը։ Իսկ այն հարցին,թե համաշխարհային շուկայում բենզինի գների թանկացումները մեր շուկայի վրա ազդո՞ւմ են, պատասխանեց, որ դա պայմանավորված է տեղափոխությամբ։ Բացի այդ, մեքենաների մեծ մասը լիցքավորվում են գազով՝ ինչը նվազեցնում է բենզինի սպառումը, այնինչ, բենզինի բիզնեսով զբաղվողները ավելի շատ հարկ են վճարում, քան գազի բիզնեսով զբաղվողները:
Անցում կատարելով իրեն պատկանող ավիացիոն բիզնեսին՝ Միխայիլ Բաղդասարովը նշեց, որ Եգիպտոս և Թունիս չվերթները դադարեցվել են, նոր չվերթներ են բացվել դեպի Լոնդոն, ձեռնարկվում է իրականացնել չվերթ դեպի Մադրիդ, շարունակվելու են Բարսելոնայի, Մարսելի և Վենետիկի չվերթները։ Պլաններ շատ կան այդ ուղությամբ, բայց քանի որ վճարողունակություն չկա, հետևաբար, դեռևս քայլեր չեն ձեռնարկվում։ Ինչ վերաբերվում է զեղչերին՝ գործարարը նշեց, որ ամռանը զեղչեր չկան, զեղչեր լինում են միայն ձմռանը:
Միխայիլ Բաղդասարովը նաև տեղեկացրեց, որ եթե նախկինում շատ ինքնաթիռներ վարձակալում էին, ապա հիմա նախընտրում են վարկեր վերցնել և գնել ինքնաթիռ։ Ներկա պահին 40 միլիոն դոլարից ավելի վարկ ունեն, իսկ «Արմավիա»-ի բանկրոտի հետ կապված խոսակցությունները իրականությանը չեն համապատասխանում և, ըստ Բաղդասարովի, պայմանավորված են ոչ թե իրականությամբ, այլ որոշ զանգվածային լրատվամիջոցների ցանկությամբ: Որոշ ինքնաթիռներ քանի որ հին են և թանկ, հետ են վերադարձվում: Ընդհանուր առմամբ, ինքնաթիռների ինքնարժեքը նվազել է համաշխարհային ճգնաժամի հետևանքով, այսինքն՝ արտադրանքն ավելի շատ է, քան պահանջարկը։
Շրջանառվող այն վարկածին, թե համաշխարհային ֆինանսատնտեսական ճգնաժամը մեղմացել է, Միխայիլ Բաղդասարովը չհամաձայնեց, նույնիսկ ավելացրեց, որ 2013 թվականին պիկ ճգնաժամի է պատրաստվում:
