Բժիշկները նախազգուշացնում են, որ արթնանալուց անմիջապես հետո անկողինը հարդարելու սովորությունը կարող է նպաստել ալերգիայի, ինչպես նաև ասթմայի զարգացմանը՝ Dermatophagoides փոշու տզերի բազմացման հետևանքով: Այս մասին գրում է «ՌԻԱ Նովոստին», հղում անելով Մեծ Բրիտանիայում անցկացված ուսումնասիրությանը:
Բրիտանական հետազոտողների խոսքերով, ցանկացած մարդու մահճակալում առկա փոշու տզերի արտազատումը որոշ մարդկանց մոտ կարող է լուրջ ալերգիկ ռեակցիաների, օրինակ, ասթմայի, ատոպիկ դերմատիտի, ալերգիկ ռինիտի, կոնյունկտիվիտի զարգացման պատճառ հանդիսանալ: Նույնիսկ ամենահամեստ հաշվարկներով, ցանկացած մարդու անկողնում, գիշերային քնից հետո, շուրջ մեկուկես միլիոն փոշու տզեր կան: Անկողինն անմիջապես արթնանալուց հետո հարդարելու դեպքում դրանց քանակն էլ ավելի շատ կլինի, պնդում են բժիշկները:
Բանն այն է, որ այդ միկրոօրգանիզմների բազմացման համար իդեալական միջավայր են ջերմ և խոնավ պայմանները, մասնավորապես, այդպիսին է անկողինը քնից հետո: Մարդու մարմինը մշտապես խոնավություն է արտազատում մաշկի ծակոտիների և շնչառության միջոցով, հատկապես տաք եղանակին՝ վերմակով փաթաթված վիճակում:
Բժիշկները նշել են, որ արթնանալուց հետո պետք է պատուհանները բացել և օդափոխել անկողինն ու սենյակը: Նվազագույնը 10 րոպե հետո նոր կարելի է հարդարել անկողինը: