23-ամյա բժշկական պրակտիկա ունեցող բրիտանացի բժիշկ Քիթ Վոլվերսոնը մտադիր է հրաժարվել բժշկի աշխատանքից, քանի որ նրա դեմ հետաքննություն է սկսվել մահմեդական կնոջ նկատմամբ խտրականության համար: Բժիշկը մեղադրանքներն անարդար է անվանել և պարզաբանել, որ կնոջը խնդրել է հեռացնել նիկաբը, քանի որ չի լսել նրա երեխայի հիվանդության հետ կապված բողոքները, գրում է Daily Mail-ը:
Բժշկի խոսքերով, սովորաբար նման խնդիրներ չեն առաջացել, քանի որ բոլոր հիվանդները ընդունելությունից առաջ հանել են նիկաբները: Այս դեպքում ևս կինն առանց առարկության կատարել է բժշկի խնդրանքը:
Սակայն կնոջ հեռանալուց հետո, կես ժամ անց, նրա ամուսինը ներխուժել է հիվանդանոց և հայտարարել, որ բողոք է ներկայացնելու դոկտոր Վոլվերսոնի դեմ: Հիվանդանոցի ղեկավարին ուղղված բողոքում տղամարդը գրել է, որ կինը կրոնական համոզմունքներից ելնելով հրաժարվել է հանել նիկաբը, ինչին ի պատասխան բժիշկը հրաժարվել է երեխայի զննումից: Նա նաև բժշկին մեղադրել է կոպտության և ռասիզմի մեջ:
Մեծ Բրիտանիայի գլխավոր բժշկական խորհուրդը, որը զբաղվում է նման բողոքներով, ռասայական խտրականության դրսևորման հետ կապված հետաքննություն է սկսել: Եթե ստուգող հանձնաժողովի որոշումը բժշկի օգտին չլինի, ապա նա կզրկվի լիցենզիայից և, հետեւաբար, բժշկական գործունեություն իրականացնելու իրավունքից:
Դոկտոր Վոլվերսոնը հայտարարել է, որ անկախ հանձնաժողովի որոշումից, նա թողնում է աշխատանքը: 23 տարվա անթերի պրակտիկա ունեցող բժիշկը հայտարարել է, որ իրեն լուրջ անարդարության զոհ է զգում: