Վարչապետ Նիկոլ Փաշինյանը հայտարարել է հանրապետության դատարանների բոլոր մուտքերն ու ելքերը առավոտյան 8.30-ից շրջափակելու մասին: Նա գրառում է արել նաև, որ վաղը կեսօրին ուղիղ եթերում կանի հայտարարություն հեղափոխության երկրորդ փուլի մեկնարկի մասին, որը նա բնորոշել է հեղափոխության ամենակարևոր փուլ: Գրեթե աներկբա է, որ խոսքը դատական համակարգի մասին է և Նիկոլ Փաշինյանի հայտարարությունը վերաբերելու է այդ համակարգի հետ կատարվելիք որևէ գործընթացի, քաղաքական որոշման:
Փաշինյանի անդրադարձը հաջորդում է Ռոբերտ Քոչարյանի խափանման միջոցի վերաբերյալ դատարանի որոշմանն ու փաստացի ստացվում է, որ դատարանի այդ որոշումը դառնում է հեղափոխության նոր ալիքի կամ փուլի կատալիզատոր: Արդյո՞ք Նիկոլ Փաշինյանի որոշումը՝ որի մասին նա խոսելու է վաղը կեսօրին, կայացվել է դատարանի որոշումից հետո, թե՞ այն եղել է դրանից առաջ դիտարկված հավանական սցենարների շարքում: Թե՞ դատարանի որոշումն ինքնին սցենարի մաս է: Այդօրինակ հարցերն իհարկե կարող են լինել մի ամբողջ շարք, սակայն կանխագուշակություն անելու փոխարեն, պետք է սպասել, թե հեղափոխության կարևոր փուլ ազդարարած վարչապետ Փաշինյանն ինչ ճանապարհային քարտեզ է մատուցելու հանրությանն ուղիղ եթերի ընթացքում:
Միաժամանակ հարկ է հիշատակել դեռևս Ռոբերտ Քոչարյանի դատավճռից առաջ՝ Արցախում Հաղթանակի տոնին մասնակցությունից հետո Երևան վերադարձած ԱԺ նախագահ Արարատ Միրզոյանի հայտարարությունը մայիսի 24-ին անցումային արդարադատության մասին խորհրդարանական լսումներ կազմակերպելու վերաբերյալ: Այդ հանգամանքը հետաքրքիր է այն ֆոնին, որ հենց Հաղթանակի տոնին ընդառաջ Արցախի գործող նախագահ Բակո Սահակյանն ու նախկին նախագահ Արկադի Ղուկասյանը կատարեցին հայտնի նախաձեռնությունը՝ երկրորդ նախագահ Քոչարյանի խափանման միջոց կալանքը փոխելու վերաբերյալ:
Անցումային արդարադատության լսումների մասին հայտարարության առումով, ի դեպ, իրադարձությունների ընթացքն ու ներկայիս վիճակը հարց է առաջացնում նաև, թե արդյո՞ք այդ ընթացքը այսպես ասած առաջ է գցել ժամանակն ու որոշակիորեն իմաստազրկել լսումները, կամ թեկուզ իհարկե նոր իմաստ հաղորդել դրանց: Այդ հարցերի պատասխանն անշուշտ ավելի տեսանելի կլինի Նիկոլ Փաշինյանի ելույթից հետո: Միաժամանակ մեկ այլ հատկանշական հանգամանք է այն, որ Ռոբերտ Քոչարյանի դատավճռի հրապարակմանը գրեթե զուգահեռ տարածվեց տեղեկություն այն մասին, որ Ղազախստանում գտնվող Հայաստանի նախագահ Արմեն Սարգսյանը, որը մասնակցում է այդ երկրում անցկացվող միջազգային տնտեսական ֆորումին, հեռախոսազրույց էր ունեցել Բարձրագույն դատական խորհրդի նախագահ Գագիկ Հարությունյանի հետ, որի ժամանակ քննարկել են ընթացիկ իրավիճակին առնչվող հարցեր: Անկասկած դա խիստ հատկանշական տեղեկություն է, որ ստացվեց Քոչարյանի դատավճռի հրապարակմանը զուգահեռ և դատելով ժամանակահատվածից, այդ հեռախոսազրույցը տեղի է ունեցել մինչև պաշտոնական դատավճռի հրապարակումը:
Ակնառու է, որ Հայաստանի դատական համակարգի շուրջ վերջին օրերին ծավալվել են բավականին նուրբ քաղաքական գործընթացներ, որոնք հասունացրել են հեղափոխության երկրորդ փուլի մասին Նիկոլ Փաշինյանի կոչը: Այն, որ Հայաստանի վերափոխումն անհնար է առանց դատական համակարգի վերափոխման, անհերքելի իրողություն է: Արդյո՞ք Ռոբերտ Քոչարյանի վերաբերյալ դատավճիռը կատալիզացնում է Հայաստանում իշխանության երրորդ ճյուղի՝ դատական իշխանափոխության գործընթացը: