Ինչպես արդեն տեղեկացրել էինք քաղաքացիական ակտիվիստ Վարդգես Գասպարիի գործով երեկ մեղադրանք է առաջադրվել «5-րդ ալիք»-ի սեփականատեր Արմեն Թավադյանին։ Նա մեղադրվում է ՀՀ քրեական օրենսգրքի 258-րդ հոդվածի 4-րդ մասով (խուլիգանություն, որը կատարվել է զենքի կամ որպես զենք օգտագործվող առարկայի գործադրմամբ):
Այս տեղեկությունը մեզ հետ զրույցում հաստատել է ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնի պետ Նաիրա Հարությունյանը: Նա ասաց, որ նախաքննական մարմինը նրան կալանավորելու միջնորդություն է ներկայացրել դատարան:
Հիշեցնենք, որ մայիսի 13-ին Ռոբերտ Քոչարյանի և մյուսների գործով դատավարության առաջին օրը Վարդգես Գասպարին բողոքի ակցիա էր իրականացրել դատարանի դիմաց՝ «Ռոբիկ սրիկա, Ռոբիկ մարդասպան» պաստառով և նույնը վանկարկելով: Սակայն Քոչարյանի աջակիցները նրա ձեռքից վերցրել և պատռել էին պաստառը, ապա ջրով լի շշով հարվածել էին նրա դեմքին: Ավելի ուշ ոստիկանությունը բերման ենթարկեց 4 անձի, նրանց թվում էր նաև Արմեն Թավադյանը:
Վարդգես Գասպարին երեկ հարցաքննվել է և ճանաչվել տուժող այս քրեական գործի շրջանակներում։
Խոսքի ազատության պաշտպանության կոմիտեի նախագահ Աշոտ Մելիքյանը, «Առաջին լրատվական»-ի հետ զրույցում անդրադառնալով Արմեն Թավադյանին մեղադրանք առաջադրելու փաստին, ասաց, որ իրավապահ մարմինները պետք է գնահատական տային կատարվածին, և հենց այդ գործընթացում էլ պարզ կլինի՝ ինչ է տեղի ուենցել: «Բայց ես, հանդիսանալով լրագրողական կազմակերպության ներկայացուցիչ, կարող եմ ասել, որ լրատվամիջոցի ղեկավարի պահվածքը պետք է համապատասխանի կոնկրետ չափանիշների։ Իսկ դատարանում տեղի ունեցած միջադեպի ժամանակ այդ անձը ցույց է տվել, որ իրեն պատկանող հեռուստաալիքը, ինքն անձամբ այնքան էլ անկողմանկալ չեն, և որ իր լրատվամիջոցը ծառայեցնում է երկրորդ նախագահի քաղաքական շահերին։ Էլ չեմ ասում, որ լրատվամիջոցի ղեկավարը պետք է զսպվածություն ցուցաբերեր և նման պատմությունների մեջ չներքաշվեր։ Կատարվածին պետք է իրավական գնահատական տրվի»,- ընդգծեց Մելիքյանը։
Մեր դիտարկմանը ի պատասխան՝ հնարավո՞ր է կատարվածը նրանց կողմից շահարկվի որպես լրատվամիջոցի ղեկավարի նկատմամբ հետապնդում, խոսքի ազատության սահմանափակման փորձ, ԽԱՊԿ նախագահը նկատեց, որ կատարվածը չի կարող շահարկվել որպես խոսքի ազատության սահմանափակման փորձ, քանի որ մեկը մյուսի հետ առնչություն չունի։ Տեղի է ունեցել կոնկրետ միջադեպ, որը քննության կարծիք ուներ, և որին իրավապահները կտան իրավական գնահատական: «Բայց ամեն ինչից զատ՝ ոչ ոք չի կարող խոսքի ազատությունն օգտագործել որպես շղարշ քաղաքակիրթ մարդուն ոչ հարիր գործողություններ կատարելու համար»,- եզրափակեց Աշոտ Մելիքյանը։