ԱՄՆ-ի հետ պատերազմի դեպքում Իրանը մենակ չի լինի․ այսպիսի հայտարարություն է արել Լիբանանի «Հիզբալա» շիաշարժման առաջնորդ Հասան Նասրալան՝ տեղեկացնում է Associated Press-ը։
Վերջին տասնամյակում Լիբանանից և Սիրիայից դեպի Իրաք, Եմեն և Գազայի հատված Թեհրանը զգալիորեն ընդլայնել է իր ներկայությունը տարածաշրջանում `հիմնվելով իրանամետ ռազմական խմբավորումների վրա՝ նշում է AP-ը:
Իրանի դաշնակիցների կողմից Իրանին հավատարմության կոչերը հնչում են Վաշինգտոնից արվող հակասական ազդակների ֆոնին։ Մի կողմից, ինչպես նախօրեին խոստովանեց նախագահ Դոնալդ Թրամփը, ամերիկյան վարչակազմը չի ձգտում Իրանի հետ ռազմական ընդհարման․ Սպիտակ տան մամլո քարտուղար Սառա Սանդերսի տեղեկացմամբ՝ Թրամփը կամենում է Իրանի կողմից «վարքային փոփոխություններ տեսնել» և հանդես է գալիս Մերձավոր Արևելքում Իրանի կողմից ցանկացած ագրեսիվ գործողության դեմ։ Մյուս կողմից, ԱՄՆ-ը տարածաշրջան է բերում լրացուցիչ ուժեր՝ ներառյալ հակառակորդին առաջին հարված հասցնելու միջոցները։