«Արցախի և Հայաստանի իշխանությունների միջև այս կամ այն հարցի շուրջ անհամաձայնություններ և լարվածություն չկա: Արցախի նախկին և ներկա նախագահների երաշխավորությունը՝ Ռ. Քոչարյանի խափանման միջոցը փոխելու համար, մարդասիրական քայլ է»,- այս մասին «Առաջին լրատվական»- ի հետ զրույցում ասաց «Իմ քայլը» խմբակցության ղեկավար Լիլիթ Մակունցը: Նա զսպվածության կոչ արեց Արցախի առանձին պաշտոնյաներին՝ կապված իրենց հայտարարությունների հետ, որոնք չեն բխում որպես մեկ ազգ միասնականության գաղափարից: Լ. Մակունցի խոսքով՝ կան վերլուծաբաններ, որոնք այս ամենը դիտարկում են որպես 2020թ. Արցախի Հանրապետությունում տեղի ունենալիք ընտրությունների նախաշեմին կատարվող գործընթացներ:
Նախկին իշխանության ներկայացուցիչների կամ նրանց քարոզչությունն իրականացնողների վարքագծում ագրեսիվություն է նկատվում, արդյո՞ք դա կարելի է համարել իշխանության կողմից թուլության նշան: Ի պատասխան այս հարցի՝ Լիլիթ Մակունցն ընդգծեց. «Դատարանում, դատարանի մոտ տեղի են ունենում բողոքի ակցիաներ. մարդիկ իրացնում են իրենց սահմանադրական իրավունքը, որն օրենքներով ամրագրված է: Եթե տեղի ունենան գործողություններ, որոնք լինեն օրինական դաշտից դուրս, ապա վստահ եմ, իրավապահ մարմինները օրենքի շրջանակներում կիրակնացնեն են իրենց գործառույթները և կարգ ու կանոն կհաստատեն: Մենք չենք պատրաստվում ժողովրդավարությունից մեկ քայլ անգամ նահանջել: Իսկ դատական իշխանության գործերին չմիջամտելը որպես թուլություն դիտարկելը պարզապես միամտություն է»:
Մանրամասն՝ տեսանյութում:
