Վերջին շաբաթները հագեցած էին՝ թե՛ արտաքին, թե՛ ներքին քաղաքական զարգացումների առումով: Նիկոլ Փաշինյանն Արևելյան գործընկերության անդամ երկրների ղեկավարների հետ մասնակցել է Արևելյան գործընկերության տասնամյակին նվիրված պաշտոնական ընթրիքին, որտեղ նաև հնարավորություն է ունեցել Ադրբեջանի նախագահի հետ կարճատև զրույց ունենալ: «Առաջին լրատվական»-ի հետ զրույցում անդրադառնալով այս դիտարկմանը՝ «Ազգային օրակարգ» կուսակցության համահիմնադիր Արա Հակոբյանը կարևորեց այցը՝ նշելով.«Կարևոր էր Հայաստանի մասնակցությունն այդ միջոցառմանը: Վարչապետը ելույթ չունեցավ, դա փոխլրացվեց Ալիևի հետ կարճատև առանձնազրույցով: Կարծում եմ՝ սահմանին տիրող վերջին լարումներն են դիտարկվել, ենթադրում եմ, որ փորձ է արվելու այդ լարվածությունը թուլացնել, չնայած Ադրբեջանի կողմից չեմ նկատում այդ միտումը»:
Ադրբեջանը հրաժարվել է ստորագրել Արևելյան գործընկերության 10-ամյակի հավաքի հռչակագիրը՝ պնահանջելով ընդգրկել Ադրբեջանի տարածքային ամբողջականությունն ընդունելու վերաբերյալ կետը: Քաղտեխնոլոգ Վիգեն Հակոբյանի խոսքով՝ ի սկզբանե Ադրբեջանը մտադրված չէր ստորագրել այդ փաստաթուղթը. «Ադրբեջանն այնպիսի պայման է դնում բոլորի առջև, որը չէր իրագործվելու: Իրականում հույս չունեին, որ իրենց այդ պահանջը, որը նման է վերջնագրի, կբավարարվի»: Արա Հակոբյանը հավելեց, որ Ադրբեջանի ծայրահեղ դիրքորոշումն ամենուրեք նկատելի է:
Վիգեն Հակոբյանի դիտարկմամբ՝ վերջին ամիսներին Հայաստանն ակտիվացրել է ԵՄ հետ աշխատանքները: Արա Հակոբյանի խոսքով՝ Հայաստանը թավշյա հեղափոխությունից հետո ակնկալում է համարժեք աջակցություն ԵՄ-ից, ԱՄՆ-ից, սակայն դեռևս նախաձեռնությամբ ու ծրագրերով հանդես չի գալիս. «Հայաստանը պետք է նախաձեռնող լինի»:
Խոսելով ներքին քաղաքական զարգացումների մասին՝ մեր զրուցակիցներն ընդգծեցին, որ քաղաքական ներքին օրակարգը պետք է ստորադասվի արտաքին օրակարգին:
Մանրամասն՝ տեսանյութում: