Իմ քայլը» խմբակցության պատգամավոր Շիրակ Թորոսյանը ճիշտ չի համարում որևէ դատական գործընթացի մասին կարծիք հայտնել, քանի դեռ այն շարունակվում է, քանի որ մի կողմից՝ խախտվում է անմեղության կանխավարկածը, մյուս կողմից՝ հնչեցված կարծիքները ճնշում են արդարադատություն իրականացնողներին:
«Ես ձեռնպահ կմնամ որևէ գնահատական հնչեցնելուց, ես վստահում եմ մեր արդարադատությանը»,- «Առաջին լրատվական»-ի հետ զրույցում ասաց Շիրակ Թորոսյանը՝ անդրադառնալով Ռոբերտ Քոչարյանի դատավարությանը:
Ինչ վերաբերում է Արցախի ներկա և նախկին նախագահների միջնորդությանը, պատգամավորն ասաց. «Դա կարող է լինել զուտ անձնական հարաբերությունների շարժառիթով: Նրանք բացի նախագահներ լինելուց՝ նաև մարդիկ են, ովքեր ունեն անձնական հարաբերություններ, ուստի նրանց որևէ քայլ մանրադիտակի տակ է և դառնում է հանրային քննարկման առարկա: Ես էլ եմ բազմաթիվ մարդկանց համար երաշխավորություններ տվել և որպես պատգամավոր օգտվել եմ իմ այդ իրավունքից»:
Շիրակ Թորոսյանի կարծիքով՝ որևէ հարց՝ ինչպիսին էլ այն լինի, չպետք է դիտարկել Հայաստան-Արցախ հարաբերությունների համատեքստում. «Դա մեծ սխալ է: Ի՞նչ կապ ունի նրանց այդ քայլը Հայաստան-Արցախ հարաբերությունների հետ: Որևէ բան չի կարող խաթարել այդ հարաբերությունները. նույնիսկ ծիծաղելի և անթույլատրելի է նման հարց քննարկելը, որովհետև այդ կերպ ջուր են լցնում մեր հակառակորդների ջրաղացը, այն էլ այն դեպքում, երբ այդ ջրաղացը գոյություն չունի»:
Առավել մանրամասն՝ տեսանյութում: