Որևէ իրավական հիմք չէր կարող լինել Գագիկ Ծառուկյանի հետ կապված քրեական գործ հարուցելու համար, որովհետև ակնհայտորեն այդ երևույթը բացակայել է ընթացիկ բիզնեսի կառավարման առումով։ Այս մասին «Առաջին լրատվական»-ի հետ զրույցում նշեց ԲՀԿ խմբակցության պատգամավոր Միքայել Մելքումյանը։
«Բնության մեջ գոյություն չունեցող երևույթները չեն կարող այլ կերպ մեկնաբանվել, քան գոյություն չունեցող երևույթներ։ Դրա համար վերջակետ դրվեց այդ հարցին, բայց մենք պետք է նաև ուշադիր լինենք, որ ամեն մի ոչ հիմնավոր հայտարարությանը այդպես ընթացք չտանք, որ գնանք, գնանք, հետո սառը ջուր լցվի»,-ասաց նա։
Ինչ վերաբերում է բիզնեսը հավատարմագրային կառավարման հանձնելուն, ըստ Մելքումյանի, պետք է ստեղծել մայր օրենք. «Մենք հավատարմագրային կառավարման մասին օրենք չունենք, ունենք ընդամենը 4-5 փոքր հոդվածներ քաղաքացիական օրենսգրքում»,-ասաց Մելքումյանը։
Նա անդրադարձավ նրան, որ կառավարությունը նորից բացասական եզրակացություն է տվել սահմանի վրա ավելացված արժեքի հարկը գոնե սննդի մասով հետաձգելու նախաձեռնությանը. «Նաև մի չարչրկված հարց կա, որ մինչև հիմա չի լուծվում, որ մեծածախ և մանրածախ առևտուրներն իրարից տարանջատենք։ Դիցուք, խոշոր հիպերմարկետի սեփականատերը նաև խոշոր ներկրող է։ Ասենք բերեց ապրանքը մեծածախ գնով, և իր հիպերմարկետում դնում նույն մեծածախ գնով վաճառում է։ Իսկ մյուսները չեն կարող նույն գնով վաճառել, որովհետև այդ գնին պետք է ավելանա շահույթը, հարկերը և գնային տարբերություն է առաջանում։ Մենք առաջարկում ենք, որ տարանջատվեն առևտուրները։ Ապրանքը ներկրել ես, փառք ու պատիվ քեզ, դրա վրա դիր շահույթ, դիր հարկեր և քո ցանցում դիր էդ մանրածախ գնով։ Կամ եթե ուզում ենք, որ փոքր խանութներն աշխատեն, գոնե շաբաթ-կիրակի օրերին խոշորները պետք է մի 2 ժամով փակվեն»,-ասաց Մելքումյանը։
