Արցախի ներկա և նախկին նախագահները՝ Բակո Սահակյանը և Արկադի Ղուկասյանն այսօր ներկայացան Երևանի ընդհանուր իրավասության դատարան՝ ըստ կարգի ներկայացնելու երկրորդ նախագահ Ռոբերտ Քոչարյանի խափանման միջոց կալանավորումը փոխելու վերաբերյալ իրենց երաշխավորագիրը: Արցախի նախագահի մամուլի խոսնակն այս առիթով ասել է, որ Բակո Սահակյանն այդ քայլի համար Երևան է գալիս ոչ Արցախի իշխանության հավաքական կամքը ներկայացնելու, այլ անձնական նախաձեռնությամբ՝ մարդասիրական անձնական գործողության շրջանակում: Այդուհանդերձ Բ. Սահակյանի և Ա. Ղուկասյանի քայլը Հայաստանում դիտարկվել է իբրև պաշտոնական Ստեփանակերտի դիրքորոշում:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Աղասի Մարգարյանը, ազատամարտիկ, ՀԱԿ վարչության անդամ Վարդան Մալխասյանը:
«Բակո Սահակյանի քայլն անտրամաբանական է,- ընդգծեց Ա. Մարգարյանը:- Եթե Ռ. Քոչարյանի խափանման միջոցը փոխելու արդյունքում նա խախտումներ անի, ինչպե՞ս է Բակո Սահակյանին Հայաստանի դատարանը որոշակի պատասխանատվության ենթարկելու, եթե նա Արցախի նախագահն է՝ իր պաշտոնական դիրքից բխող անձեռնմխելիություն ունեցող անձ. այլ կերպ ասած՝ այդ երաշխավորությունն առ ոչինչ է դառնում»:
«Քոչարյանն առանձնապես ծանր հանցանքներ է գործել Հայաստանի և հայ ժողովրդի նկատմամբ, նա անարգել է հայ ժողովրդին, կողոպտել է երկիրը բոլոր ուղղություններով, վաստակել է հայ ժողովրդի ատելությունը և այսօր հայտնվել է ողորմելի, ողբալի և միաժամանակ ծիծաղելի վիճակում: Այդ վիճակն ինքն է առաջ բերել»,- նշեց Վ. Մալխասյանը: Ազատամարտիկը նաև ընդգծեց. «Բացի փաստաբաններից, բոլոր նրանք, ովքեր փորձում են աջակցել կողոպտիչներին, ուզուրպատորներին, երկիրը թալանողին, ծանր հանցագործությունների մեջ թաղվածին, իրենք նույնպես դառնում են հանցագործության մասնակից»:
«Բակո Սահակյանն իր հիմար քայլով առաջին հերթին իրեն նսեմացրեց, դարձրեց հողերին հավասար»,- նշեց ազատամարտիկը՝ հավելելով, որ Արցախի ներկա և նախկին նախագահներն այդ քայլով խաչ քաշեցին իրենց ապագայի՝ քաղաքական հետագա գործունեության վրա:
Մանրամասն՝ տեսանյութում: