Ինչպե՞ս են Մարտի 1-ի զոհերի ծնողները գնահատում այդ գործով դատավարության ընթացքը, մասնավորապես դատավարության մասնակիցների փաստական ու փաստային պատրաստվածությունը, մեղադրողներին և մեղադրվողներին: «Առաջին լրատվական»-ի այս հարցին ի պատասխան՝ Գոռ Քլոյանի հայրը՝ Սարգիս Քլոյանը, մասնավորապես ասաց. «Առաջին օրվա դատավարությունը ես որակում եմ՝ «շատ վատ»: Ոստիկանները պատրաստ չէին, չէին պատկերացնում, թե ինչքան ժողովուրդ կլինի: Դատավարության ժամանակ …ուղղակի, կներեք, խուժանություն եղավ, որովհետևՌոբերտ Քոչարյանի աջակիցները անգամ Վահե Գրիգորյանին և Սեդա Սաֆարյանին թույլ չէին տալիս, որ ներս մտնեն: Նրանք գրավել էին դահլիճը: Վարդգես Գասպարիին ծեծի ենթարկեցին… Մի խոսքով՝ այլանդակություն էր տիրում: Երկրորդ օրն արդեն ոստիկանները պաշտպանում էին կարգուկանոնը, ես դահլիճում եմ եղել…»: Նա հավելեց, որ փաստաբանական կողմը իրեն շատ վատ է դրսևորել, հատկապես Ալումյանը «սուտ էր ասում դատավորին, թե ցուցարարները զինված են եղել զենքերով, նռնակներով, ձողերով, փայտերով…»:
Մարտի 1-ի զոհերից Արմեն Ֆարմանյանի հայրը՝ Վաչագան Ֆարմանյանը, նշեց, որ ինքը մեծ դժվարությամբ է կարողացել մտնել դատական նիստի դահլիճ, նույնիսկ բախում է եղել ոստիկանների հետ: «Նույն պատկերն էր, ինչ 2008 թվին, հըլը երևի ավելի բեթար»,- ասաց նա:
Խոսելով Ռոբերտ Քոչարյանի՝ դատարանում արած այն հայտարարության մասին, թե մարտիմեկյան դեպքերից հետո Ազգային անվտանգության ծառայության ղեկավարը իրեն տեսագրություն է ցույց տվել, որն ապացուցում էր, որ ցուցարարները զինված են եղել և ագրեսիվ քայլեր են արել, իսկ հիմա այդ տեսանյութը չկա, զոհերից Գրիգոր Գևորգյանի այրին՝ Վարդուհի Բաղդասարյանը, նշեց, որ եթե նման տեսանյութ լիներ անցնող տարիների ընթացքում իշխանությունները դա հրապարակավ ցույց կտային, կապացուցեին իրենց անմեղությունը»: «Դա բացահայտ սուտ է»,- շեշտեց նա:
Մանրամասները՝ տեսանյութում։
