Լուրեր
Ծառուկյանի թիմը մանիպուլյատիվ կերպով օգտագործում է վարչապետի խոսքը
  • 15:45
  • 2019-05-16
  • Դիտումներ՝ *

ՀՔԾ-ն մերժել է «Բարգավաճ Հայաստան» խմբակցության ղեկավար Գագիկ Ծառուկյանի դեմ քրեական գործի հարուցումը հանցադեպի բացակայության հիմքով: Թեմայի շուրջ զրուցելու համար «Առաջին լրատվական»-ը հյուրընկալել է «Դետեկտոր» վերլուծական նախագծի գլխավոր խմբագիր, քաղաքագետ Էդգար Վարդանյանին և «Քաղաքացու որոշում» կուսակցության գործադիր մարմնի անդամ, քաղաքագետ Գոռ Հակոբյանին:

«Հարցը հիմնականում պետք է դրվեր քաղաքական համատեքստում, որովհետև սա քաղաքականությամբ զբաղվելու իրավունքի խնդիրն է, բայց իր ենթաճյուղերում նաև ունի իրավական խնդիր»,- նկատեց Գոռ Հակոբյանը՝ հավելելով, որ խոսքը Գագիկ Ծառուկյան անձին չի վերաբերում:

Նրա խոսքով՝ այս հարցը պետք է լուծում ստանա. «Հասկանանք՝ 95-րդ հոդվածն ինչպես է մեկնաբանվում. նոր Հայաստանում այդ դրույթը պահպանվո՞ւմ է արդյոք»:

Էդգար Վարդանյանն էլ կարծում է, որ վարչապետի խոսքը, թե՝ պարոն Ծառուկյանը խոշոր սեփականատեր է, մանիպուլյատիվ կերպով օգտագործվել և օգտագործվում է Գագիկ Ծառուկյանի և նրա թիմակիցների կողմից, որպեսզի ցույց տրվի, թե վարչապետն ասել է՝ նա բիզնեսմեն չէ. «Սակայն վարչապետը նման պնդում չի արել. նա ընդամենն ասել է ճշմարտության այն մասը, որն ակնհայտ է, ինչը չի նշանակում, թե պարոն Ծառուկյանը բիզնեսմեն չէ»:

Քաղաքագետի խոսքով՝ խնդիր կա օրենքի մեկնաբանման հետ կապված, և այս հարցը դառնում է իրավական վեճի առարկա. «Էնպես չի, որ սեփականատերը իր բիզնեսը տալիս է հավատարմագրային կառավարման և վերջ՝ այլևս որևէ կապ չի պահպանում: Միևնույն է՝ դու ստանում ես շահույթ և շահագրգռված ես, որ շահույթդ ավելին լինի: Իսկ երբ դու մտնում ես քաղաքական ասպարեզ, այստեղ շահերի բախման խնդիր է առաջանում՝ դու, միևնույն է, դե ֆակտո զբաղվում ես բիզնեսով: Այլ հարց է՝ դե յուրե այդպե՞ս է, թե՞ ոչ: Եվ ՀՔԾ-ն այս դեպքում ասում է՝ ոչ, դե յուրե այդպես չէ»:

 

Հարցազրույցն ամբողջությամբ՝ տեսանյութում:

  • Դիտումներ՝ *