Իտալիայի Թուրինի քաղաքապետ Կիարա Ապենդինոյին փամփուշտով ծրար են ուղարկել: Վերջին մեկուկես ամսվա ընթացքում սա արդեն երկրորդ սպառնալիքներով ուղերձն է նրա հասցեին, հայտարարել է քաղաքապետը Facebook-ի իր էջում:
«Այս ահաբեկման փորձերը ոչ մի ազդեցություն չեն ունենալու և, ընդհակառակը, ինձ դրդում են քաղաքապետի աշխատանքը կատարել ամենայն վճռականությամբ», – գրել է նա, հրապարակմանը կցելով ծրարի և փամփուշտի լուսանկարը: Նրա խոսքերով, նամակ ուղարկողն անհայտ է, ինչպես որ նրա շարժառիթները:
Ապրիլի 1-ին Իտալիայի Թուրինի քաղաքային խորհուրդը պարզունակ պայթուցիկ սարքով փաթեթ է ստացել: Այն նախատեսված էր Ապենդինոյի համար, որն այդ պահին գտնվել է քաղաքապետարանի շենքում:
Քննիչների վարկածով, պայթուցիկի ուղարկողները տեղի անարխիստներն են, որոնք նման կերպ իրենց բողոքն են հայտնում ոստիկանության կողմից իրենց զբաղեցրած, այսպես կոչված, «սոցիալական կենտրոններից» մեկի փակման համար:
Տեղական լրատվամիջոցների տվյալներով, անարխիստական շրջանակների մի շարք սպառնալիքների արդյունքում, Ապենդինոն արդեն մի քանի ամիս է տեղաշարժվում է ոստիկանության ուղեկցությամբ: