Լուրեր
Քոչարյանի մեղադրանքին պետք է ավելացնել ևս մեկ հոդված
  • 21:45
  • 2019-05-15
  • Դիտումներ՝ *

Մեկնարկել է Մարտի 1-ի գործով դատավարությունը: Ռոբերտ Քոչարյանը 2008թ. մարտի 1-ի իրադարձությունների վերաբերյալ քրեական գործով մեղադրվում է սահմանադրական կարգը տապալելու և խոշոր չափի կաշառք ստանալու մեջ: Թեմայի շուրջ «Առաջին լրատվական»- ի հետ զրույցում հանրային կապերի մասնագետ Արամազդ Ղալամքարյանը նշեց. «Մի կողմից՝ չէի ուզենա չափազանց մեծ ուշադրություն դարձնեինք այս դատավարությանը, բայց մյուս կողմից՝ այս դատավարությունը բացառիկ է տեղի ունեցած դեպքերի առումով՝ Հայաստանի նորանկախ հանրապետության պատմության ընթացքում երբևէ չէր եղել այնպես, որ մայրաքաղաքի կենտրոնում ուղիղ կրակոցներով գնդակահարվեին քաղաքացիներ. ցուցարարների գնդակահարություն երբեք չէր եղել: Համամաիտ եմ այն մարդկանց կարծիքին, որ այս դատավարությունը լակմուսի թղթի դեր է կատարելու՝ երկրի ինքնիշխանության մակարդակի տեսակետից… Պետք է բացառել արտաքին ազդեցությունը»:

Ա. Ղալամքարյանի դիտարկմամբ՝ ասելով, թե շատ մարդիկ են ներգրավված եղել Մարտի 1-ի իրադարձություններին, լավ չենք պատկերացնում ողջ վնասը, որ հասցվել է մեր հասարակությանը և պետությանը. «Ես իրավաբան չեմ, բայց Ռոբերտ Քոչարյանի մեղադրանքին կավելացնեի ևս մի հոդված՝ պետական ահռելի միջոցների վատնում»:

«Ակնհայտ է, որ հանրային աջակցություն չունեցող, բայց շատ հարուստ գործիչ է դատվում, բնականաբար նա պիտի փորձի ինչ-որ կոնսոլիդացիա, աղմուկ ստեղծել իր շուրջը՝ փորձելով դրանով ճնշել դատարանին: Ողջ հասարակության խնդիրն է՝ դա թույլ չտալ, բայց նաև չգնալ սադրանքների: Փորձ է արվելու դատական պրոցեսը քաղաքական դաշտ տեղափոխել, աղմուկ բարձրացնել»,- ընդգծեց մեր զրուցակիցը՝ կոչ անելով վերահսկել իրավապահներին՝ որպես քաղաքացիներ, բայց չգնալ դատավարության վայր, չտրվել սադրանքի՝ հաղթաթուղթ տալով Քոչարյանի կողմից գնված մի քանի տասնյակ մարդկանց:

Մանրամասն՝ տեսանյութում:

  • Դիտումներ՝ *