Միջուկային զենք ստանալու համար ամենադժվար քայլը ուրանը մինչև 20 տոկոս հարստացնելն է, ինչը արդեն բավարար է միջուկային զենք ստանալու համար։
Այս մասին այսօր հայտարարել է Իրանի հոգևոր առաջնորդ Ալի Խամենեին՝ ակնարկելով, որ Իրանում կարող են վերսկսել միջուկային ծրագիրը։
«Ամենադժվարը ուրանը 20 տոկոս հարստացնելն է։ Իսկ հաջորդ քայլերը ավելի հեշտ կլինեն, քան դա»,– ասել է այաթոլլա Խամենեին։
Այս հայտարարությունը հոգևոր առաջնորդն արել է Իրանի շուրջ բարդացող միջազգային իրավիճակի պայմաններում. միջուկային գործարքից դուրս գալուց հետո ԱՄՆ-ն խստացրել է պատժամիջոցները, իսկ եվրոպացիները չեն կարողանում ոչնչով օգնել Իրանին, թեև կողմ են միջուկային գործարքը պահելուն։ Իրանը երկու ամիս է տվել եվրոպացիներին լուծման ուղիներ գտնելու համար։
Հիշեցնենք, որ 20 տոկոսն այն շեմն է, երբ այդքան հարստացված ուրանը կարող է օգտագործվել միջուկային մարտագլխիկ ստանալու համար։ Դրա համար միջազգային հանրությունը փորձում է թույլ չտալ դա և այսպես կոչված «խաղաղ ուրանի» համար սահմանել է 3-4 տոկոս հարստացման շեմ։ Սա այն մակարդակն է, երբ ուրանը կարելի է օգտագործել ատոմային էներգիա ստանալու համար, բայց դեռ բավարար չէ միջուկային զենք ստեղծելու համար։
