«Մամուլի հետ սուրճ» հաղորդման մայիսի 15-ի հյուրը «Սիվիլնեթ»-ի լրագրող Մկրտիչ Կարապետյանն է։
Մեր զրուցակիցն անդրադարձավ Ռոբերտ Քոչարյանի աջակիցների բողոքի ակցիաներին և նշեց.«Դատավարությունը երկար է տևելու, գործը մեծ է՝ մի քանի հատորից է բաղկացած։ Ինչ-որ իմաստով սպասելի էր, որ Քոչարյանի աջակիցները նրան կպաշտպանեն, բայց որ ագրեսիվ գործողություններ կլինեին՝ անսպասելի էր։ Օրինակ հեռուստաընկերության տնօրենի՝ շշով հարվածելը, ինչ անոմալ բան ասես տեսանք»։
Խոսելով Արցախի ղեկավարների՝ դատարան ներկայացրած միջնորդության մասին, Մկրտիչ Կարապետյանն ընդգծեց.«Ես չեմ հասկանում, ինչպես կարող է Բակո Սահակյանը երաշխավորել, որ Ռոբերտ Քոչարյանը չի ազդելու հետագա քննության վրա, Ի՞նչ է անելու՝ իր հետ ամեն տեղ գնալու՞ է։ Երկրորդ՝ մեղադրանքը շատ ծանր է, երբ մարդը երաշխիք է տալիս, շատ լավ հասկանում է, թե ինչ մեղադրանքի տակ է մտնում։ Երևի իրենց սիրտը ցավում է Քոչարյանի համար»։
