Հոկտեմբերի 17-ին սիրիական Լաթակիա նավահանգստից հումանիտար առաքելությամբ “Viva Palestina-5” անվանումով նավերի նոր խումբ է պատրաստվում շարժվել, սակայն այս անգամ ոչ թե դեպի Գազա, այլ դեպի եգիպտական Ալ-Արիշ նավահանգիստ, որտեղից հումանիտար բեռը կհասցվի Պաղեստինի Գազայի հատված: Այս առաքելության հեղինակները հայտարարում են, որ սա ամենամասսայական փորձն է ճեղքելու Գազայի շրջափակումը: Բեռները դեռ սեպտեմբերին դուրս են եկել Լոնդոնից` մի քանի տասնյակ բեռնատարներով դեղորայք եւ բժշկական սարքավորումներ տեղափոխելով դեպի Սիրիա:
Առաքելության հեղինակն է բրիտանացի խորհրդարանական Ջորջ Գելոուեյը, ով նախկինում էլ է նմանատիպ ակցիաներ կազմակերպել: Հումանիտար շարասյունն արդեն անցել 4828կմ, որին ճանապարհին միացել են մեքենաներ Մարոկկոյից, Ալժիրից, Հորդանանից, Սուդանից եւ Քուվեյթից: Ինչպես հայտնել են որոշ լրատվամիջոցներ, “Viva Palestina-5” նավատորմի երկու նավ անցնելու են այն կետով, որտեղ մի քանի ամիս առաջ տեղի էր ունեցել բախում իսրայելական սահմանապահների հետ: Նրանք ծրագրում են ծաղկեպսակ իջեցնել այդ վայրում: Ենթադրվում է, որ նավերի վրա կգտնվեն 380 պաղեստինամետ կազմակերպությունների ակտիվիստներ աշխարհի 42 երկրներից, 147 բեռնատար` հումանիտար բեռներով, որի ընդհանուր արժեքը կազմում է $5մլն: