Դատարանում դեռևս մարտի 1-ի բուն գործը չի քննվում, ընդամենը Ռոբերտ Քոչարյանի խափանման միջոցի հարցն է քննվում։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Վահագն Հովակիմյանը՝ անդրադառնալով «Մարտի 1»-ի մեկարկած դատավարությանը։
Նա նկատեց, որ անգամ դատավարության մյուս կողմերը, այդ թվում՝ տուժողները, նրանց իրավահաջորդները, գործող անցնող մյուս ամբաստանյալները, չեն կարող այս փուլում հանդես գալ։
Դիտարկմանը, որ սա «դարի դատավարություն» է և որ սրանով յուրատեսակ լյուստրացիա է լինելու, մասնավորապես, հաշվի առնելով, թե այսօր արդեն ովքեր են աջակցում Ռոբերտ Քոչարյանին, իշխող ուժի պատգամավորը դրական պատասխան տվեց. «Այո, տեսնում եմ նման գործընթաց և դրա համար շատ ուրախ եմ, որովհետև շատ տխուր կլիներ, եթե այնտեղ ազատության, արժանապատվության համար պայքարող քաղաքացիների զանգվածներ տեսնեինք։ Ես դա չեմ տեսնում, ու դրա համար շատ ուրախ եմ։ Իսկ այնտեղ գտնվող մարդիկ անձնական և բարեկամական կապերով փոխկապակցված, մեկը մյուսին ինչ-որ բանով պարտական անձինք են։ Մեկին բանտից է բաց թողել, մյուսն այլ լավություն է արել, մարդիկ էլ իրենց պարտքն են վերադարձնում, գնում գոռում են՝ ազատություն Ռոբերտ Քոչարյանին»,-ընդգծեց Վահագն Հովակիմյանը։
