Խոսքի ազատության պաշտպանության կոմիտեի և փաստաբան Կարեն Տոնոյանի աջակցությամբ երեք տուժած լրագրողներ՝ Հակոբ Կարապետյանը, Գևորգ Ղազարյանը և Թեհմինե Ենոքյանը, ապրիլի 2-ին ՀՔԾ-ի որոշման դեմ բողոք էին ներկայացրել դատախազություն։ Դատախազությունը վերացրել է ՀՔԾ-ի որոշումը «Էլեկտրիկ Երևանի» քրեական գործով վարույթը կասեցնելու մասին և հանձնարարել է վերսկսել նախաքննությունը։
Փաստաբան Կարեն Տոնոյանն ասում է, որ դատախազության որոշումը հույս է, որ քննությունը կշարունակվի, և որոշակի արդյունքի կհասնենք։ Կ.Տոնոյանը «Առաջին լրատվական»-ի հետ զրույցում ներկայացրեց մանրամասներ: Հակոբ Կարապետյանի մասով կոնկրետ Հունան Պողոսյանի հետ կապված դրվագն է, որտեղ Հակոբ Կարապետյանն ասում է, որ Հունան Պողոսյանի հանձնարարությամբ իրենից վերցրել են տեսախցիկը, միջից չիպը հանել են ու չեն վերադարձրել։
«Թե որքանով կհիմնավորվի այդ մասը, մի քիչ դժվար է ասել, որովհետև իրենք ընդհանրապես հերքում են այդ դեպքը տեղի ունենալու փաստը»,- ասաց փաստաբանը։
Թեհմինե Ենոքյանի մասով կա մի դրվագ, որում մի ոստիկան նրան հայհոյում է։ Այդ ոստիկանի մասով նրանք համարում են, որ հայհոյանքը չի կարող հետևանք առաջացնել։ Այնտեղ կան նաև քաշքշոցի դրվագներ, որոնք բացահայտված չեն, թե ովքեր են եղել։
Գևորգ Ղազարյանի մասով ծեծի դրվագ կա, որով ևս առաջընթաց չկա։ Ընդհանրապես, երեքի մասով էլ ինչ-որ արդյունքի հասնելու բան չկա»,-հավելեց փաստաբանը։
Հարցին, թե կարելի՞ է պնդել, որ դատախազության և ՀՔԾ-ի միջև տարաձայնություն կա՝ մասնավորապես այս գործով, Տոնոյանը պատասխանեց. «Ես այդ մասով ոչինչ չեմ կարող ասել, բայց թե՛ ես, թե՛ մյուս տուժողի ներկայացուցիչները, գուցե իրենց վարույթներում այնպիսի հարցեր են բարձրացրել, որ դատախազությունն էլ տեսել է, որ պետք է անդրադառնալ դրանց, դրանք էլ քննարկել, նոր գալ ինչ-որ որոշման։ Մենք մեր բողոքում ասում էինք, որ իրավական գնահատականներ տրվեն արարքներին։ Թեկուզ Հունան Պողոսյանի մասով, կամ նրա, ով Թեհմինեին հայհոյել է։
Մենք ասում ենք, որ իրավական գնահատական դրանց չի տրվում։ Կամ գուցե դատախազությունում էլ տեսել են այդ խնդիրը, որ ամեն դեպքում պետք է գնահատական տրվի։ Ուղղակի, որ որոշում չենք ստացել, չգիտենք, թե ինչն են հիմք վերցրել, ինչից ելնելով են նման որոշում կայացրել»։
Լրագրող, գործով տուժող Թեհմինե Ենոքյանը պատմեց, որ 2015 թ. հունիսի 23 առավոտյան 247 անձ է բերման ենթարկվել ոստիկանական բաժիններ, սակայն տուժող են ճանաչվել միայն 53-ը։ Սա, նրա խոսքով, խոսում է այն մասին, որ քննիչը ջանք չի գործադրել անգամ տուժողներին բացահայտելու ուղղությամբ։ Լրագրողը դժգոհ է. համարյա 4 տարի է՝ ՀՔԾ-ն չի հայտնաբերել օրը ցերեկով բռնություն գործադրած ոստիկանական համակարգում աշխատող անձանց։
«Իմ կողմից նկարահանված կադրերում համակարգի աշխատողների ինքնությունը 40-ից 20-ի դեպքում բացահայտվել են։ Ոստիկանությունը հետաքննության հրապարակումից հետո հայտարարությամբ հանդես չեկավ, ոչ էլ հերքում պահանջեց, եթե ես սխալ տվյալներ էի հրապարակել, ոչ էլ հաստատեց։ Արթուր Սաքունցը այդ տվյալների վրա նոր քրեական գործ հարուցելու բողոքով դիմել էր ՀՀ գլխավոր դատախազություն, մինչև օրս պատասխան չկա»,- ասաց նա։
Նրա խոսքով՝ ճիշտ է, գործը կասեցումից դուրս է եկել, սակայն քննիչը չի փոխվել, այդ մեծ ծավալով գործը ինչպես 4 տարի առաջ, այնպես էլ հիմա քննում է 1 քննիչ: «Քննչական համակարգը ցանկություն չունի ոստիկանական համակարգում աշխատող, այժմ արդեն բարձր պաշտոններ զբաղեցնող անձանց հայտնաբերելու. որոշները վարչության պետեր կամ պետի տեղակալներ են։ Սակայն կանխակալ կարծիք չեմ ցանկանում հայտնել, ՀՔԾ-ն այլ ճանապարհ չունի, քան բացահայտել, հեղափոխությունից հետո այս գործը ուղարկել դատարան, հակառակ պարագայում ոչ արդյունավետ քննության պատճառով կունենանք բազմաթիվ վճիռներ ՄԻԵԴ-ում ընդդեմ ՀՀ-ի»։
