Այսօր մեկնարկեց Մարտի 1-ի գործով դատավարությունը: Ինչո՞վ է շրջադարձային այս դատավարությունը Հայաստան պետության կյանքում կամ իրավական պետություն կառուցելու ճանապարհին: «Առաջին լրատվական»-ի այս հարցին ի պատասխան՝ ԱԺ նախկին փոխնախագահ Կարապետ Ռուբինյանը մասնավորապես ասաց. «Կարծում եմ՝ դատավարությունը շրջադարձային է նրանով, որ ոճիրը, Մարտի 1-ի ողբերգական դեպքերը, որ տեղի ունեցան, առանձնահատուկ էին նաև պետական ապարատի լկտիությամբ: Այդ ամենը զարգացավ տարիների սպասումով, թե երբ է գալու չարի վերջը, և հիմա մենք ականատեսն ենք, որ մոտեցել է չարի վերջը: Նաև տեսնում ենք, որ չարը, այնուամենայնիվ, ինչ-որ ռեսուրսներ ունի, որ նաև փորձում է պայքարել, չի համակերպվում իր վերջի հետ: Հուսով եմ, որ այդ վերջը կլինի»:
«Խոսելով դատավարության ընթացքում Ռոբերտ Քոչարյանի աջակիցների վարքի մասին՝ նախկին քաղբանտարկյալ Գրիգոր Ոսկերչյանն ասաց. «Այն, որ Ռոբերտ Քոչարյանը աջակիցներ կունենա, կարծում եմ՝ պարզ է, բնական է: Բայց այդ աջակիցների մեջ քաղաքական անցյալ կամ քաղաքացիական ակտիվիստի անցյալ ունեցող մարդկանց դեմքեր չենք տեսնում»: «Ինչ վերաբերում է ընդհանուր գնահատականին, ես ուզում եմ շեշտել, որ մարտիմեկյան դեպքերի, իրադարձությունների ամբողջական բացահայտումն ու քաղաքական գնահատական տալը, դատապարտումը իսկապես էական նշանակություն ունի մեր պետության ապագայի իմաստով»,- նշեց նա:
Կլինի՞ Մարտի 1-ի ամբողջական բացահայտում: Այս հարցին ի պատասխան՝ նախկին քաղբանտարկյալ Արամ Բարեղամյանը նշեց, որ «ժամանակը ցույց կտա. չենք շտապում: Կարևորը, որ դատավարությունը բաց է լինելու, բոլորը իմանալու են՝ ինչ է կատարվել: «Բայց ես ավելի կարևոր հարց եմ ուզում բարձրացնել. դատավարությունը դեռ չսկսված՝ կոշտ միջամտություն կա այս դատավարությանը: Խոսքը վերաբերում է Արցախի նախագահ Բակո Սահակյանի և նախկին նախագահ Արկադի Ղուկասյանի նամակին: Արկադի Ղուկասյանը պաշտոն չի զբաղեցնում հիմա և կարող է իր կարծիքը ազատ արտահայտել, իսկ Բակո Սահակյանի դեպքում, կարծում եմ, պաշտոնական միջամտություն է: Գումարած՝ Վիտալի Բալասանյանի միջամտությունը»,- ասաց նախկին քաղբանտարկյալը, որը նաև տուժող է Մարտի 1-ի գործով:
Մանրամասները՝ տեսանյութում։
