Ածխաթթվային գազի (CO2) խտությունը Երկրի մթնոլորտում մարդկության պատմության մեջ առաջին անգամ գերազանցել է 415 մասնիկը՝ մեկ միլիոնի հաշվով (ppm). այսինքն՝ յուրաքանչյուր խորանարդ մետր օդում առկա է ոչ պակաս, քան 415 մլ ածխաթթվային գազ: Այդ մասին մայիսի 13-ին հայտնել է CNN հեռուստաընկերությունը:
Նրա տվյալներով՝ 415,26 ppm ռեկորդային ցուցանիշը մայիսի 11-ին գրանցվել է Օվկիանոսների և մթնոլորտի ուսումնասիրման ԱՄՆ-ի ազգային վարչության դիտարանի (NOAA) մասնագետների կողմից, որը գտնվում է Հավայի կղզու Մաունա-Լոա հրաբխի գագաթին:
«Սա առաջին անգամն է մարդկության պատմության մեջ: Ոչ միայն փաստագրված պատմության մեջ և ոչ 10 հազար տարի առաջ գյուղատնտեսության հայտնվելու պահից»,- Twitter-ի իր էջում նշել է ամերիկացի օդեերևութաբան Էրիկ Հոլթհաուսը:
Մթնոլորտում CO2-ի խտության բարձրացումը նպաստում է ջերմոցային Էֆեկտի առաջացմանը: Փորձագետների ճնշող մեծամասնությունը գտնում է, որ հանածո վառելիք այրող մարդու գործունեությունը Երկրի վրա կլիմայի տաքանալու հիմնական պատճառներից մեկն է։
