Թամանյանական Երևանն ի սկզբանե կոմպլեքսային քաղաք էր, որտեղ շատ կարևոր տեղ էին զբաղեցնում հանգստի գոտիները, կանաչապատ տարածքները և հուշարձանները: Երևանի ճարտարապետական դեմքի մասին «Առաջին լրատվական»-ի հետ զրույցում ճարտարապետ, պրոֆեսոր Կարեն Բալյանն անդրադառնալով դիտարկմանը, որ Խորհրդային Միության փլուզումից հետո Երևանն աստիճանաբար կորցրեց դեմքը, նշեց, որ միտումներ չի տեսնում՝ վերադարձնելու Երևանի մշակութային դեմքը: «Սիրում էինք Երևանը, որն ուներ իր դեմքը, բայց կարմիր գիծը հատեցինք, քառորդ դար շարունակ այդ դեմքը ձևափոխվեց, իհարկե, նոր դեմք, նոր պատկեր է ստանում, բայց այն մի կողմից՝ չի շարունակում այն ավանդույթները, որ կային, խաթարում է դրանք, մյուս կողմից՝ ստեղծվում է միջավայր, որը որոշակի ուղղություն չունի: Եվ այս գործունեությունը հենց թամանյանական Երևան դրոշմի ներքո էր արվում, իբրև թե վերականգնվում էր թամանյանական Երևանը, բայց այդպես չարվեց, այլ աղճատվեց Երևանի պատկերը»,- նշեց Բալյանը:
Ճարտարապետի խոսքով՝ Երևանում կառուցվում են 20 հարկանի շենքեր, որոնց գլխին ստալինյանի շրջանի առանձնատներին բնորոշ կամարաշար վերջավորություններ են. «Ցավալի է, որ հիմա՝ ազատության այս շրջանում, մենք նորից վերադարձել ենք ստալինյան բռնապետության ժամանակաշրջանի ճարտարապետությանը»,- ընդգծեց ճարտարապետը՝ հավելելով, որ բազմիցս այդ մասին բարձրաձայնել է, սակայն ապարդյուն, և խնդիրն այն է, որ ճարտարապետական այդ հետընթացը շարունակական է:
Մանրմասն՝ տեսանյութում: