ՀՀ մշտական բնակչության թիվը 2019 թ. ապրիլի 1-ի դրությամբ կազմել է 2 962.1 հազ. մարդ, այդ թվում քաղաքայինը` 1 893.4 հազ. Մարդ, և գյուղականը` 1 068.7 հազար մարդ: Այս տվյալը հրապարակել է ՀՀ Ազգային վիճակագրական կոմիտեն։
2018 թ. նույն ժամանակահատվածի համեմատ՝ բնակչության թիվը նվազել է 7,8 հազարով։ Տարվա սկզբի համեմատ՝ հանրապետության բնակչության թիվը նվազել է 3,2 հազարով։
2019 թ. առաջին եռամսյակում հանրապետությունում գրանցվել է 8042 ծնունդ, ինչը 3,1%-ով քիչ է 2018թ. նույն ժամանակահատվածի համեմատ։ Հաշվետու ժամանակահատվածում մահացությունների թիվն աճել է 3,4%-ով՝ կազմելով 7 373։
ՀՀ աշխատանքի և սոցիալական հարցերի նախարարության ժողովրդագրական բաժնի պետ Արտակ Մարկոսյանը «Առաջին լրատվական»-ի հետ զրույցում ասաց, որ պատկերը մտահոգիչ չէ, քանի որ այն ամփոփում է միայն 2019-ի առաջին եռամսյակը։
– Մենք դեռևս ունենք բնական հավելաճ։ Պահը դեռ դրական է։ Բայց միգրացիայի մնացորդի հաշվին ունենք բնակչության ընդհանուր հավելաճի նվազում։
– Պարոն Մարկոսյան, բայց այս ցուցանիշները դեռևս ցույց են տալիս, որ արտագաղթի որոշ տեմպեր դեռ պահպանվում են։
– Այո, որոշակիորեն այո, բայց ներկայացված վիճակագրության մեջ շատ հուսադրող ցուցանիշներ կան։ Եթե նայում ենք բնակչության ելքն ու մուտքը, ապա շատ կարևոր ցուցիչ կա՝ 2019 թվականի հունվար-մարտին 2018 թվականի հունվար-մարտի համեմատ ՀՀ անցաթղթերով ելք ու մուտքի տարբերությունը դրական է։ Վերջին տարիներին այդպիսի թիվ չի եղել։ Սա նշանակում է, որ մեր՝ ՀՀ անձնագրերով ելքի ու մուտքի տարբերությունը դրական է։ Վերջին 10 տարում այդպիսի թիվ չի եղել։
Այստեղ երկու ցուցիչ կա՝ ընդհանուր ուղևորահոսք, որը դեռևս բացասական է՝ -3400, սակայն սա նշանակում է, որ արտասահմանցիները եկել-գնացել են, բայց ՀՀ անձնագրերով ելք ու մուտքը դրական է այս տարի։ Նախորդ տարի այս ցուցանիշը եղել է բացասական՝ -2695։
Դրական տեղաշարժ ունենք նաև ամուսնությունների թվաքանակով։ Բացարձակ թվով հաշված՝ առաջին եռամսյակում, նախորդ տարվա նույն ժամանակահատվածի համեմատ, ամուսնությունները աճել են 202-ով՝ 5.6 տոկոսով։ Շատ կարևոր է, որ բավականին նվազել է ամուսնալուծությունների թիվը՝ մոտ 171-ով կամ 16.7 տոկոսով։ Սա էլ է բավականին լավ ցուցանիշ։
– Բայց ամուսնությունների աճին ու ամուսնալուծությունների թվի կրճատմանը զուգահեռ նվազել է նաև ծնելիությունը։
– Այո, նվազել է, բայց 3.1 տոկոսով կամ բացարձակ թվով 255-ով։ Որշակիորեն ավելացել են նաև մահացությունները, ինչը սեզոնային բնույթ է կրում։ Ձմռանը և գարնանը հատկապես խրոնիկ հիվանդություններ ունեցողների մոտ սրացումներ են լինում։ Թերևս, դրանով էլ պայմանավորված է այս եռամսյակում մահացությունների թվի աճը։ Որոշակի իմաստով նվազել է բնական հավելաճը։
– Դա մտահոգիչ չէ՞։
– Ընդհանուր առմամբ այո, բայց հնարավոր է՝ տարվա կտրվածքով կրկնվի նախորդ տարվա ցուցանիշը։ Բայց առանձին մարզերում մենք ունենք դրական բնական հավելաճ։ Օրինակ՝ Արարատի մարզում։ Թվերը ընդհանուր առմամբ վատը չեն։ Հասկանալի է, որ դեռ խնդիր կա, բայց դրական միտումներ են նկատվում։
– Ինչո՞վ եք պայմանավորում Ձեր նշած դրական միտումները։
– Օրինակ՝ ամուսնությունների թվաքանակի աճը, հնարավոր է, կապված է նրա հետ, որ մարդիկ, երիտասարդները հույսեր են կապում Հայաստանի հետ, տրամադրությունների փոփուխություն է եղել, և որոշել են մնալ Հայաստանում ու ամուսնանալ։ Հուսանք, որ ամուսնությունների դրական միտումներին զուգահեռ՝ կավելանան առաջնեկների թիվը, որը անկման տեսանկյունից ամենամտահոգիչն էր վերջին տարիների ընթացքում։
– Պարոն Մարկոսյան, Դուք 1 ամսից ավել է՝ նշանակված եք ժողովրդագրական բաժնի պետ։ Նախկինում Դուք մշտապես քննադատել եք Հայաստանի ժողովրդագրական քաղաքականությունը։ Ներկայումս առկա պատկերը շտկելու համար ի՞նչ կոնկրետ գործողություններ են արվում։
– Թույլ տվեք այս փուլում այդ հարցին չպատասխանեմ։ Կոնկրետ աշխատանք կատարվում է, բայց պետք է մի քիչ սպասել։
