Հեղափոխությունից հետո հայտարարվեց, որ մեր արտաքին քաղաքական հարաբերություններում փոփոխություններ չեն լինելու՝ մի երկրի հետ հարաբերություններն այլ երկրների հետ հարաբերությունների հաշվին չեն զարգանալու: Ի՞նչ ունենք գործնականում մեկ տարի անց, արդյո՞ք հաջողվել է բալանսավորել արտաքին քաղաքականությունը: «Առաջին լրատվական»-ի հետ զրույցում, անդրադառնալով այս և մի շարք այլ հարցերի, հանրային կառավարման փորձագետ Սոսի Թաթիկյանը նշեց. «Բազմավեկտորությունը նախկինում էլ, այժմ էլ մնում է մեր արտաքին քաղաքականության հայտարարված սկզբունքը, որը նշանակում է բալանսավորված հարաբերություններ կառուցել մի կողմից՝ Ռուսաստանի, Իրանի հետ, մյուս կողմից՝ Արևմուտքի՝ ԱՄՆ-ի և ԵՄ-ի հետ:
Ես լիովին ընդունում եմ այս քաղաքականությունը, չեմ կարծում, որ ռադիկալ փոփոխություններ պետք է անել և պրոարևմտյան գիծ զարգացնել: Մեր աշխարհաքաղաքական պայմաններում բազմավեկտորությունն այլընտրանք չունի: Բայց կա մեկ այլ խնդիր՝ բազմավեկտորությունը վերջին ավելի քան տասը տարիներին կրել է միայն դեկլարատիվ բնույթ, իրականում մեր արտաքին քաղաքականությունը մի ուղղությամբ է գերզարգացել, խոսքը ՌԴ հետ հարաբերությունների, ՀԱՊԿ և ԵԱՏՄ անդամակցության մասին է, և մյուս բոլոր ուղղություններով հարաբերությունները տուժել են:
Վարչապետը հայտարարեց, որ հեղափոխությունից հետո հարաբերությունների բալանասավորում տեղի կունենա, բայց կառավարության ծրագրում կրկին միայն Ռուսաստանի հետ հարաբերությունն է նշված՝ որպես ռազմավարական ուղղություն, մյուս բոլոր երկրների հետ հարաբերությունների վերաբերյալ այլ բառեր են օգտագործված՝ գործընկերային, կարևոր և այլն: Կարծում եմ՝ բալանասավորելու համար կարելի էր ԵՄ-ն էլ որպես ռազմավարական գործընկեր նշել, թեև հավակնություններ չունենք ԵՄ անդամ դառնալու»:
Փորձագետի կարծիքով՝ հեղափոխությունից հետո պետք է աշխատել ոչ միայն «վերից վար», այլ նաև «վարից վեր», պետք է անընդհատ վերլուծել ինչ զարգացումներ ու նախաձեռնություններ կան, և պրոկատիվ առաջարկներ անել այդ նախաձեռնություններում ներգրավվելու համար. «Նման աշխատելաոճը կարող է բալանսավորված իրավիճակ ստեղծել մեր արտաքին քաղաքականությունում»:
Մանրամասն՝ տեսանյութում: