Մայիսի 13-ին կմեկնարկի Մարտի 1-ի գործով դատավարությունը: Թեմայի շուրջ «Առաջին լրատվական»-ի հետ զրույցում իրավապաշտպան, նախկին դատավոր Պարգև Օհանյանը նշեց, որ մեր դատական պրակտիկայում Մարտի 1-ի գործը ամենամեծ հանրային հնչեղություն ունեցող և ամենաբարդ գործերից է, մոտ 60 հատոր գործ է, և հաշվի առնելով նաև վկաների և տուժողների մեծ թիվը՝ ակնկալվում է, որ դատավարությունը կլինի տևական: «Բարդ է լինելու միանձնյա քննող դատավորի համար նաև այն պատճառով, որ դրվագներն են շատ: Դատավորին ես խղճում եմ, նրա գործը շատ ծանր է լինելու»,- նշեց Պ. Օհանյանը՝ հավելելով, որ եթե ինքը դեռևս դատավոր լիներ և իրեն առաջարկվեր այդ գործի վարումը, ինքնաբացարկ կհայտարարեր: «Դատավորները կարող են խուսափել այդ գործից. վախերը տարբեր են՝ առջևում՝ հուր, ետևում՝ սուր: Դատավորները վախեցած են և՛ հին իշխանություններից, և՛ նոր. նորը խիստ պահանջներ է դրել, հինը՝ սպառնում է… Դատավորները միշտ հարվածի տակ են»:
Նախկին դատավորի դիտարկմամբ՝ այս դատավարությունը չպետք է միանձնյա՝ մեկ դատավորով լինի. «Հաճախ եմ ասում, որ այս հարցին պետք է լուծում տրվի. ակնարկս այն է, որ «Նյուրնբերգյան դատավարության» հետ զուգահեռ պետք է փոփոխություններ անել և ստեղծել ծանր գործեր քննող դատարաններ կամ դա լինի ի դեմս գործող Վերաքննիչ դատարանի, և նաև ապահովել երդվյալ դատավորների ինստիտուտը»:
Նախկինում ոչ անկախ եղած դատավորը այսօր կարո՞ղ է դատական պրոցես վարել. ի պատասխան այս հարցի՝ Պ. Օհանյանը նշեց. «Արդյո՞ք անկախությունը բացարձակ կատեգորիա է… Սահմանադրությունը դատավորին հռչակում է անկախ և անաչառ: Մեծ հաշվով՝ դատավորները դե ֆակտո անկախ են եղել, բայց միևնույն ժամանակ կախյալ են եղել դատախազությունից, դատարանի նախագահներից, որոնք կարգադրիչ ֆունկցիա ունեն, էլ չեմ ասում՝ բարձրագույն դատական խորհրդի մասին: Նախագահականից, կառավարությունից հատուկենտ գործերով միջամտություններ նախկինում եղել են, հիմա չի լինի, տա Աստված սխալվեմ, բայց էլի լինելու են»:
Մանրամասն՝ տեսանյութում:
