ԱՄՆ պետքարտուղար Մայք Պոմպեոն մայիսի 12-ին այցով կուղևորվի Մոսկվա, այնտեղից էլ՝ Սոչի, որտեղ մայիսի 14-ին պլանավորված են նրա բանակցությունները ՌԴ արտաքին գործերի նախարար Սերգեյ Լավրովի հետ, և որտեղ նա հույս ունի, որ իրեն կընդունի Ռուսաստանի նախագահ Վլադիմիր Պուտինը: Այդ մասին մայիսի 10-ին հայտնել է Պետդեպարտամենտի մամուլի ծառայությունը՝ տեղեկացնում է TASS-ը։
«Պետքարտուղար Պոմպեոն կուղևորվի Սոչի, Ռուսաստան, և մայիսի 14-ին հանդիպում կունենա Ռուսաստանի արտաքին գործերի նախարար Սերգեյ Լավրովի և նախագահ Վլադիմիր Պուտինի հետ՝ քննարկելու մի ամբողջ շարք երկկողմ ու բազմակողմ մարտահրավերներ»,- նշվում է փաստաթղթում:
Մայիսի 13-ին Պոմպեոն Մոսկվայում հանդիպում կունենա ԱՄՆ դեսպանության աշխատակիցների, ամերիկյան գործարար հանրակցության ներկայացուցիչների և ամերիկացի ուսանողների հետ:
«Պետքարտուղար Պոմպեոն ծաղկեպսակ կդնի Անհայտ զինվորի շիրիմին»,- հայտնել է Պետդեպարտամենտը: Ինչպես նշվել է Ռուսաստանի ԱԳ նախարարության՝ մայիսի 8-ին տարածված հաղորդագրության մեջ, Լավրովը Պոմպեոյի հետ ՌԴ նրա այցի ընթացքում քննարկելու է երկկողմ հարաբերությունները, Վենեսուելայի, Սիրիայի և Ուկրաինայի իրադրությունը: Սոչիում հանդիպման շուրջ պայմանավորվածությունը ձեռք է բերվել դիվանագիտական գերատեսչությունների ղեկավարների՝ Արկտիկական խորհրդի նիստի շրջանակներում մայիսի 6-ին Ռովանիեմիում կայացած բանակցությունների ընթացքում։