«Առաջին լրատվական»-ի զրուցակիցն է Արցախի նախագահ Բակո Սահակյանի աշխատակազմի ղեկավարի տեղակալ Դավիթ Բաբայանը։
– Պարոն Բաբայան, ՀՀ վարչապետն արձագանքել է Արցախի ղեկավարների՝ Ռոբերտ Քոչարյանի խափանման միջոցը փոխելու վերաբերյալ դիմումին և նշել, որ Արցախի ղեկավարները Հայաստանի ներքին գործերին միջամտելու հնարավորություն չունեն։ Արդյոք դիմումն այդպիսի փո՞րձ էր, կա՞ արդյոք նման ցանկություն։
– Արցախն ընդհանրապես չի միջամտում Հայաստանի ներքին գործերին, Հայաստանն էլ չի միջամտում Արցախի ներքին քաղաքականությանը. սա հրամայական է։ Նամակը պետք է դիտարկել պարզապես մարդասիրական տիրույթում և ոչ թե միջամտություն համարել։ Այդպիսի բան պարզապես հնարավոր չէ, անթույլատրելի է։ Արցախը որևէ այդպիսի նպատակ չի ունեցել և չպետք է ունենա։ Հետևաբար սա պետք է դիտարկել մարդասիրական տեսանկյունից, այլ ոչ թե ներքին քաղաքական միջամտությունների և այլ գործընթացների տիրույթում։
– Կարծում եք՝ սա հետագայում Երևանի և Ստեփանակերտի հարաբերությունների վրա անդրադարձ կունենա՞։
– Չեմ կարծում, գիտեք, որ վարչապետ Փաշինյանը եկել է Արցախ, և մենք արդեն տարածել ենք տեղեկատվություն, որ վարչապետ Փաշինյանն ու նախագահ Սահակյանը այցելել են Ստեփանակերտի մայր տաճար, մասնակցել տոնական միջոցառումներին։
Շատ ջերմ մթնոլորտում հանդիպել, առանձնազրույց են ունեցել։
– Իսկ այդ հարցն առանձնազրույցի ընթացքում շոշափվե՞լ է։
– Չեմ կարծում, թե այդ հարցին անդրադարձ է կատարվել, չգիտեմ, ես այդ տեղեկությունը չունեմ։ Խոսվել է երկու հայկական հանրապետությունների փոխգործակցությանը վերաբերող տարբեր հարցերի շուրջ։ Կարծում եմ՝ այդ հարցը փակված է, որովհետև նամակը իր բնույթով եղել է զուտ մարդասիրական, պատասխանն էլ եղել է, և այդ հարցը փակած է։
– Բայց հարց է առաջանում՝ արդյոք Արցախի ղեկավարներին որևէ մեկը չէ՞ր հուշել, որ հարցն այլևս դատախազության տիրույթում չէ։
– Կրկնում եմ՝ դա զուտ մարդասիրական հարց է, ոչ թե քաղաքական կամ իրավական։ Պարզապես իրենց ցանկությունն է եղել, պարզապես դիմել են դատախազին, որևէ քաղաքական կամ իրավական ենթատեքստ ու խնդիր չկա։
– Վարչապետ Փաշինյանը ասուլիսի ընթացքում նաև նշել է, թե ինչո՞ւ Արցախի հերոս Մանվել Գրիգորյանի հետ կապված նման մոտեցում չկար։ Տպավորություն է, որ կոնկրետ Քոչարյանի հարցով սելեկտիվ մոտեցում է կիրառվում։
– Սելեկտիվ մոտեցման խնդիր չկա։ Նախևառաջ մենք ասել ենք, որ ամեն ինչ պետք է լինի օրենքի սահմաններում։ Հիմա խնդիրն ի՞նչ է, ինչո՞ւ Քոչարյանին… ես չեմ կարող հարյուր տոկոսով պատասխանել, դա երկու նախագահների անձնական ցանկությունն է, միգուցե հաշվի է առնվել, որ Քոչարյանը եղել է և՛ Արցախի, և՛ Հայաստանի նախագահը։ Ես այլ ենթատեքստ չեմ տեսնում և կրկնում եմ՝ սա իրենց անձնական նախաձեռնությունն է. երևի թե տրամաբանությունը սա է եղել։
