Վարչապետ Նիկոլ Փաշինյանը, մայիսի 8-ին ամփոփելով իր վարչապետության մեկ տարին, 100 փաստ ներկայացրեց հետհեղափոխական Հայաստանի մասին և իր կառավարության ձեռքբերումների մասին: Այս առիթով «Առաջին լրատվական»-ի հետ զրույցում հանրային ֆինանսների և հանրային կառավարման փորձագետ Հովհաննես Ավետիսյանը մասնավորապես ասաց. «Վարչապետի ներկայացրածը չհամակարգված կառավարման հաշվետվություն էր ինձ համար, այսինքն՝ մի հաշվետվություն, որտեղ տեղեկատվությունը ներկայացված է ցաքուցրիվ, և հիմնականում դա հաշվետվություն էր ծախսերի մասին, բայց արդյունքային ցուցանիշներ չնկատեցի. օրինակ՝ ծախս ենք արել, դրա դիմաց ինչ ենք ստացել»:
«Ինձ համար դա չհամակարգված կառավարման ցուցիչ է նաև, և դա մարդու մասին չէ, այլ փողի, ինչ-որ պրեցեսի մասին է, որը մարդու սոցիալական վիճակի մասին չի խոսում»,- նշեց նա:
«Իմ քայլը» դաշինքի պատգամավոր Հայկ Գևորգյանը, հակադարձելով Հ. Ավետիսյանին՝ նկատեց, որ վարչապետի ներկայացրածի մեջ նշվում էր, որ հազարավոր մարդկանց աշխատավարձեր ու թոշակներ են բարձրացվել: «Եթե դա չէ մարդու մասին, ի՞նչը պիտի նկատի ունենանք մարդու մասին կամ վերաբերյալ ասելով»,- հարցադրում արեց նա՝ միաժամանակ նշելով, որ խորհուրդ կտար վարչապետի հաշվետվությունը քննարկել մակրոտնտեսական տեսանկյունից:
