«Բացի խորհրդարանական և արտախորհրդարանական ուժերից՝ մյուս որոշ շրջանակների ներկայությունը նաև ինձ համար էր զարմանալի: Եվ ցավով արձանագրեցի, որ այդ մարդիկ հերթական անգամ փորձեցին հարթակը օգտագործել իրենց քարոզչական թեմաներն արծարծելու համար»,- «Առաջին լրատվական»-ի հետ զրույցում ասաց Ստեփանակերտում ՀՅԴ կազմակերպած ֆորումին մասնակցած՝ «Իմ քայլը» խմբակցության պատգամավոր Տաթև Հայրապետյանը:
Քաղաքագետ Նարեկ Մինասյանը ինքնին ֆորումը կարևոր է համարում, քանի որ Հայաստանի և Արցախի միջև կան որոշ իրավահարաբերություններ, որոնք ինստիտուցիոնալ կարգավորման կարիք ունեն. «Դրա հետ կապված մոտեցումները շատ տարբեր են. Դաշնակցությունը միտված է ռազմավարական դաշինքի կնքման միջոցով իրավահարաբերությունների կարգավորման տարբերակին»:
Նա ևս կարծում է, որ ոչ բոլոր ելույթներն էին թեմայի շրջանակներում, ինչը չէր նպաստում բովանդակային քննարկումներին. «Թեմայի հետ կապված ցանկացած քաղաքական մանիպուլյացիա, կարծում եմ, չի բխում տվյալ թեմայի շահերից և մեր ազգային շահերից՝ հաշվի առնելով թեմայի կարևորությունը»:
Ինչ վերաբերում է Ռոբերտ Քոչարյանի վերջին հարցազրույցին և հարցին, թե որն է այն ընդդիմադիր բևեռը, որի հետ համագործակցության մասին նշել է Քոչարյանը, «Իմ քայլը» խմբակցության պատգամավորն ասաց. «Իրականում որոշ շրջանակներ, այդ թվում՝ քոչարյանական շրջանակները, փորձում են այդ թվացյալ իմիջը ստեղծել ու Արցախը ներկայացնել նախկին իրենց գործելակերպին հավատարիմ և տպավորություն ստեղծել, թե Արցախը հակահեղափոխական է, ինչն իրականում գոյություն չունի: Արցախում և Հայաստանում, անկախ բոլոր մանիպուլյացիաներից, քաջ գիտակցում են, որ մեր հաջողության գրավականը մեր միասնականությունն է: Մենք մի հայրենիք ենք, նման բան ուղղակի չի կարող գոյություն ունենալ՝ անհնար է: Դա նրանց վերջին թպրտոցն է»:
Հարցազրույցն ամբողջությամբ՝ տեսանյութում:
