Երևանից եկել ու առաջինը Շուշի եմ մտել, ցավալին այն է, որ Շուշին մենք ազատագրեցինք, բայց 10 տարի մեր պետությունը ոչ մի ֆինանսավորում չէր անում։ Այս մասին «Առաջին լրատվական»-ի հետ զրույցում նշեց Արցախի հերոս, գեներալ-մայոր Արկադի Տե-Թադևոսյանը՝ հավելելով, որ ամեն տարի պետությունն ընդամենը 100 հազար դոլար էր տրամադրում քաղաքին, ինչ էլ արվում էր, արվում էր բարերարների շնորհիվ։
«Հիմա պետական ծրագիր կա, որով իրականացվում է շինարարություն, բնակեցվում է Շուշին։ Առաջ 2 հազար մարդ էր ապրում, հիմա արդեն 3,5 հազարով ավելացել է։ Սա ինձ շատ ուրախացրեց, կոչ եմ անում բոլորն ուրախանան, որ Շուշիում պետական մակարդակով շինարարություն է ընթանում»,-ասաց նա։
Անդրադառնալով շփման գծում վերջին օրերին կրակոցների ավելացմանը, Կոմանդոսն ասաց. «Միշտ էլ Ադրբեջանի ղեկավարների հետ հանդիպումների ժամանակ պայմանավորվում են, որ զինադադարը չխախտեն, բայց ոչ մի անգամ Ադրբեջանը իր խոսքը չի պահում։ Ինձ թվում է, որ Ադրբեջանի պրոպագանդայի համար շատ պետք է, որ զոհեր լինեն։ Հարցն այն է, որ Ադրբեջանում կան ազգեր, որոնք ճնշված են, ուզում են իրենց լեզուն, մշակույթը, կրոնը պահեն։ Նրանք այնքան էլ մեր դեմ չեն, ու Ադրբեջանը այդ ազգերի ներկայացուցիչներին բերում է առաջին գիծ։ Հետո իրենք կրակում են, մերոնք պատասխանում են, իրենք զոհ են տալիս ու սկսում են դա ռեկլամ անել»։