Ես չեմ կարծում, որ Արցախի իշխանությունը պաշտոնապես աջակցություն է հայտնել Ռոբերտ Քոչարյանին, դա իշխանության մեջ գտնվող անհատների աջակցություն է: Այս մասին, այսօր՝ մայիսի 9-ին, լրագրողների հետ զրույցում նշեց ԱԺ փոխնախագահ Ալեն Սիմոնյանը, անդրադառնալով դիտարկմանը, որ ՀՀ երկրորդ նախագահ Ռոբերտ Քոչարյանը հայտարարել է որ կմիանա նոր ստեղծվող ընդդիմությանը եւ Արցախի իշխանություններն էլ աջակցություն են հայտնել նրան:
«Որեւէ մտավախություն չկա, ես միայն ուրախ եմ որպես իշխանության ներկայացուցիչ, որ Ռոբերտ Քոչարյանը փորձում է իր շուրջը միավորել ընդդիմությանը: Չեմ կարծում, որ դա կստացվի, որովհետեւ ինձնից էլ լավ գիտեք մարդկանց վերաբերմունքը եւ պարոն Քոչարյանի վարկանիշը: Ես բոլորիդ խորհուրդ եմ տալիս Ռոբերտ Քոչարյանի մասին խոսելիս երբվեւիցե չօգտագործել նախագահ բառը, որովհետեւ Ռոբերտ Քոչարյանը եւ Սերժ Սարգսյանը երբեք ընտրված նախագահ չեն եղել: Նրանք ուղղակի մարդիկ են եղել, որ զբաղեցրել են այդ պաշտոնը»,-ասաց նա՝ հավելելով, որ հավանական չի համարում, որ Քոչարյանի շուրջ կարող է ընդդիմադիր բեւեռ ձեւավորվել:
