«Մենք բազմիցս նշել ենք, որ հին Հայաստանի գործիչների հետ մենք անելիք չունենք: Կարծում եմ՝ իրենց ժամանակն անցել է, և անիմաստ է նորից այդ քննարկումը վերաբացել»,- «Առաջին լրատվական»-ի հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով ՀՀ երկրորդ նախագահ Ռոբերտ Քոչարյանի վերջին հարցազրույցին:
Մեր զրուցակցի խոսքով՝ իրենք հետևում են բոլոր պրոցեսներին, և Արցախում ՀՅԴ կազմակերպած համաժողովը ինքը չի դիտարկում որպես աջակցություն Ռոբերտ Քոչարյանին. «Հնարավոր է՝ այնտեղ եղել են Քոչարյանի աջակիցներ, բայց դա որևէ բան չի փոխում Արցախյան հիմնախնդրի կարգավորման մեր օրակարգում»:
«Ով ում ուզում է՝ թող միանա, ով ինչ բևեռ ուզում է՝ թող ստեղծի. սա նոր, ժողովրդավարական Հայաստանն է, և ես որևէ խնդիր չեմ տեսնում»,- ընդգծեց Էդմոն Մարուքյանը և հավելեց, որ Արցախի երկու նախագահների կողմից Ռոբերտ Քոչարյանի խափանման միջոցի միջնորդությունը չի համարում աջակցություն. «Պետք չէ թեման դարձնել շահարկման առարկա և Հայաստան-Արցախ որևէ առումով խնդիր առաջացնել»:
Առավել մանրամասն՝ տեսանյութում: