Այն, ինչ պատկերացրել եմ այն ժամանակ Շուշին ազատագրելուց հետո, հիմա այդպես չի, ես ավելին կուզենայի, որ ունենայինք։ Այս մասին «Առաջին լրատվական»-ի հետ զրույցում նշեց ԼՂՀ ինքնապաշտպանական մարտերի առաջին հրամանատար Արկադի Կարապետյանը։
«Ունենք այն, ինչ ունենք, ինչը բավարար չեմ համարում։ Ասեմ ավելին, որ իմ կարծիքով կարելի էր անել շատ ավելին և հասնել շատ բաների, բայց չարվեց։ Գուցե ես եմ սխալ, բայց ուղիները տեսնում եմ, թե ոնց կարելի էր անել, կամ հիմա ինչ կարելի է անել։
Համակարգային բաներ պետք է փոխվեր, որը չարվեց»,-ասաց նա։
Արկադի Կարապետյանի խոսքով, գաղափարախոսություն չկա մեր ազգի մեջ Արցախում, ոչ Հայաստանում. «Մենք չգիտենք՝ ինչ ենք ուզում, ինչ ճանապարհով ենք ուզում հասնել իր ուզածին։ Այդ հարցերի պատասխանները չունենք։ Օրինակ չինացիներն ունեն, նրանք 5-10 տարով չեն մտածում, հազարամյակներով են մտածում և իրենց նպատակին հասնում են, որքան էլ դժվարությունների հանդիպեն։ Որովհետև իրենք գիտեն, թե ինչ են ուզում, իսկ մենք չգիտենք։ Ժամանակ առ ժամանակ անհեթեթ գաղափարներ են մտցվում մեր ազգի մեջ ու մենք ուրիշներին հավատալով ընկնում ենք ծուղակի մեջ միշտ»։
