Ազգային վիճակագրական ծառայությունը հրապարակել է 2019 թ. տվյալները, այդ թվում՝ ժողովրդագրական վիճակի վերաբերյալ թվեր: Հայաստանում մինչև թավշյա հեղափոխությունը անվստահություն կար վիճակագրական տվյալների նկատմամբ, իսկ ինչպիսի՞ն է վիճակն այսօր, ինչպիսի՞ն է հասարակության վերաբերմունքը հենց վիճակագրական ծառայության հրապարակած տվյալների նկատմամբ: Պատասխանելով «Առաջին լրատվական»-ի հարցերին՝ Աշխատանքի և սոցիալական հարցերի նախարարության ժողովրդագրության բաժնի պետի ժամանակավոր պաշտոնակատար Արտակ Մարկոսյանը մասնավորապես ասաց. «Մենք միշտ մի տվյալ ենք ունեցել՝ պաշտոնական, այլ տվյալ Հայաստանում չի եղել, և ցանակացած փորձագիտական եզրակացություն նույնիսկ հիմնվել է վիճակագրական ծառայության տվյալների վրա: Ամենաարժանահավատը, համենայն դեպս այսօրվա դրությամբ, վիճակագրական ծառայության տվյալներն են»:
Սոցիոլոգիական գիտությունների թեկնածու Սամվել Մանուկյանը նշեց, որ «ժողովրդագրական վիճակին վերաբերող՝ Ազգային վիճակագրական ծառայության տվյալները բացարձակապես ճիշտ են: Որովհետև Հայաստանի Հանրապետությունում՝ և՛ երկրորդ հանրապետությունում, և՛ երրորդ հանրապետությունում, զարգացած էր վիճակագրության ոլորտը: Այնտեղ աշխատում էին տարիների փորձ ունեցող բարձրակարգ պրոֆեսիոնալներ, աշխատում են միջազգային հղկված մեթոդաբանությամբ, և այն տվյալները, որ հիմա հրապարակվում են,- ես խոսում եմ ժողովրդագրության մասին, ոչ թե այլ տվյալների,- բացարձակապես ճիշտ են»: «Դա՝ շնորհիվ այն բանի, որ գրանցվում են բոլոր ծնունդները, նաև՝ մահերը, եթե դրանք տեղի են ունեցել Հայաստանում, եթե Հայաստանում չեն, իսկ մի քանի չճանաչված դիակները վիճակագրորեն նշանակալի չեն»,- մասնավորեցրեց նա:
Հրապարակված տվյալների համաձայն՝ 2018 թ. ապրիլի 1-ի դրությամբ Հայաստանի ամբողջ բնակչության թիվը 2 մլն 969 հազար էր, իսկ 2019 թ. ապրիլի 1-ի դրությամբ այդ թիվը 2 մլն 962 հազար է, այսինքն՝ բնակչության թիվը նվազել է: Ի՞նչն է խնդիրը, որ թացշյա հեղափոխությունից հետո բնակչության նվազման աճ է գրանցվել: Այս հարցին ի պատասխան՝ Արտակ Մարկոսյանն ասաց. «Պետք է դիտարկել նախորդ ժամանակաշրջանների նվազման տեմպերը: Նշեմ, որ 2018 թ. 2017 թ. համեմատությամբ նույն ժամանակաշրջանում ունեցել ենք նվազման դանդաղում՝ 32 տոկոսով, այսինքն՝ եթե 2018 թ. ապրիլի 1-ին 2017-ի ապրիլի 1-ի համեմատ բնակչությունը նվազել էր 11600-ով, ապա այժմ մենք ունենք 32 տոկոս նվազման տեմպի դանդաղում: Եթե դիտարկենք 2017 թվականը, ապա այդ տեմպը դանդաղել է 37 տոկոսով. 2016-ի համեմատ ունեինք 12900 բացասական հավելաճ: Այսինքն՝ նախորդ տարիների համեմատ այս տարի մենք ունենք բավականին բարվոք վիճակ»:
Մանրամասները՝ տեսանյութում։