Մեծ Բրիտանիան վաղաժամ է համարում Իրանի նկատմամբ պատժամիջոցների վերականգնման մասին խոսելը, սակայն նախազգուշացնում է, որ Իրանի կողմից միջուկային ծրագրին վերաբերող պարտավորությունների չկատարման դեպքում նրան հետևանքներ են սպասում: Այդ մասին մայիսի 8-ին հայտարարել է ասիական և խաղաղօվկիանոսյան տարածաշրջանների գծով նախարար Մարկ Ֆիլդը՝ ելույթ ունենալով խորհրդարանում՝ տեղեկացնում է RIA Novosti-ն։
«Մեծ Բրիտանիան խիստ անհանգստացած է Գործողությունների համատեղ համապարփակ ծրագրի վերաբերյալ Իրանի հայտարարությունից: Մենք սերտ կապի մեջ ենք համաձայնագրի մյուս մասնակիցների հետ»,- ասել է Ֆիլդը:
«Մենք կոչ ենք անում Իրանին՝ չձեռնարկել այնպիսի քայլեր, որոնք կուժեղացնեն լարվածությունը և կատարել իր պարտավորությունները: Դեռևս վաղ է խոսել պատժամիջոոցների վերականգնման մասին, սակայն հարկ է հիշել, որ դրանք հանվել են միջուկային սահմանափակումների փոխարեն՝ ԳՀՀԾ-ին համապատասխան: Եթե Իրանը չկատարի իր պարտավորությունները, ապա, բնականաբար, կլինեն հետևանքներ: Եթե Իրանը կատարի իր պարտավորությունները, ապա Մեծ Բրիտանիան նույնպես կկատարի իր պարտավորությունները»,- ընդգծել է նախարարը։