Հունիսի 9-ին Կոտայքի մարզի Աբովյան քաղաքում տեղի է ունենալու քաղաքապետի ընտրություն: Գործող համայնքապետ Վահագն Գևորգյանը հայտարարել էր, որ կրկին մասնակցելու է ընտրություններին: Օրերս Կոտայքի մարզպետ Ռոմանոս Պետրոսյանն էլ լրագրողների հետ զրույցում հայտարարեց, որ «Քաղաքացիական պայմանագիր» կուսակցությունն առաջադրելու է իր թեկնածուին: ՔՊ վարչությունը որոշում է կայացրել Աբովյանի քաղաքապետի հերթական ընտրություններին առաջադրել «Քաղաքացիական պայմանագիր» կուսակցության Աբովյանի տարածքային կառույցի անդամ, նախկինում տեղական ինքնակառավարման ոլորտում փորձ ունեցող Գրիգոր Գուլյանին:
Կոտայքի մարզպետ Ռոմանոս Պետրոսյանը նախօրեին «Առաջին լրատվական»-ի հետ զրույցում ասել էր, որ ՔՊ թեկնածուի շանսերը ընտրություններում բավականին բարձր են այն կոնտեքստում, որ Աբովյանում դեռևս տեղական ինքնակառավարումն իրականացվում է նախկին իշխանության ներկայացուցիչ քաղաքական ուժի աջակցությունը վայելող քաղաքապետի կողմից:
Առայժմ այլ թեկնածուներ առաջադրվելու մասին հայտարարություններ չեն արել։ Որոշ տեղեկություններով՝ առաջադրվելու ցանկություն է ունեցել նաև Աբովյանի քաղաքապետի նախկին ընտրություններին առաջադրված Արթուր Հարությունյանը։
– Պարոն Հարությունյան, պատրաստվո՞ւմ եք առաջադրվել Աբովյանի քաղաքապետի ընտրություններում։
– Քանի որ Նիկոլ Փաշինյանը ընտրված է ժողովրդի կողմից և Աբովյանի ընտրություններում ներկայացնում է իր թեկնածուին, ապա ես ճիշտ չեմ համարում իմ թեկանծությունն առաջադրել և դեմ գնալ ժողովրդի ձայները ստացած ուժի թեկնածուին։
– Այսինքն՝ չե՞ք առաջադրվում։ Իսկ սատարելո՞ւ եք ՔՊ թեկնածուին։
– Այո, ես չեմ առաջադրվելու և պաշտպանելու եմ Նիկոլ Փաշինյանի կուսակցության կողմից առաջադրված թեկնածուին։
– Առաջադրվելու ցանկություն է հայտնել նաև ձեր նախկին մրցակիցը՝ գործող քաղաքապետը։ Ձեր կարծիքով՝ երկրում իրավիճակի փոփոխությունը կնպաստի՞, որ նորմալ ընտրություն լինի, թե՞ կանխատեսում եք, որ կլինի այն, ինչ նախորդ ընտրությունների ժամանակ։
– Ինձ թվում է, որ նրան, ինչ եղավ նախորդ ընտրությունների ժամանակ, վերադարձ չկա։ Հույս ունենք, որ ապագայում սպասվելիք ընտրությունները ժողովրդավարական բոլոր չափանիշներին համապատասխան կլինեն։
– Իսկ Ձեր կարծիքով՝ Ծառուկյանը դեռ պահպանո՞ւմ է իր ազդեցությունը մարզում, մասնավորապես՝ Աբովյանում։
– Ինչ վերաբերում է Ծառուկյան Գագիկի ազդեցությանը, ապա երբ որ իշխանական լծակները Ծառուկյան Գագիկի տակից դուրս գան ամբողջությամբ, ապա Ծառուկյանը կարող է ազդեցություն ունենալ բացառապես իր ընտանիքում։ Ո՛չ ավել։ Իսկ իշխանական լծակների մի մասն արդեն դուրս է եկել նրա տակից, բայց մի մասը մնում է։
– Իսկ ո՞ր մասն է մնացել։ Իշխանական ի՞նչ լծակների է տիրապետում հիմա Ծառուկյանը։
– Սպորտը դեռ իր ազդեցության տակ է։ Տեսնում ենք, թե բոքսի ֆեդերացիայի նկատմամբ ինչ կողմնակալ մոտեցում է ցույց տալիս նախարարությունը։ Ակնհայտ է, որ սպորտի նախարարությունը պատվեր է կատարում։ Չի կարելի սպորտը քաղաքականացնել։ Ամեն մի անհատի, ով մտահոգ է սպորտով, մարդկանց պետք է հնարավորություն տալ, այլ ոչ թե մի կազմակերպության ֆինանսավորումը դադարեցնել՝ ասելով՝ դու լեգիտիմ ես կամ լեգիտիմ չես։ Նման մոտեցումն անընդունելի է։
Սպորտի ներկայացուցիչների նկատմամբ չի կարելի այդպես վարվել։
Պարոն Հարությունյան, իսկ Դուք ՔՊ-ի թեկնածուին ճանաչո՞ւմ եք, թե՞ նրան սատարելու եք միայն նրա համար, որ իշխանության թեկնածուն է։
– Շատ խելացի, շատ պարկեշտ, օրինակելի անձնավորություն է:
