Թուրքիայի զինծառայողները ռուսական С-400 զենիթային հրթիռային համակարգերի շահագործմանը կծանոթանան Ռուսաստանի տարածքում գտնվող ռազմական կենտրոններից մեկում, հաղորդում է ՏԱՍՍ-ը, հղում կատարելով ռազմա-դիվանագիտական աղբյուրին:
Գործակալության զրուցակիցը հայտնել է, որ մայիսի վերջին շուրջ 100 թուրք զինծառայողներ կժամանեն Ռուսաստան: Դասընթացները կսկսվեն հունիսին և կտևեն մոտ հինգ ամիս: Նրանց հետ միաժամանակ նույն կենտրոնում կվերապատրաստվեն նաև Չինաստանի ժողովրդական-ազատագրական բանակի զինվորականները. նրանց դասընթացները սկսել են այս տարվա մարտին:
«Չինաստանի և Թուրքիայի զենիթայինների միաժամանակյա ուսուցումն աննախադեպ կլինի նախկին ԽՍՀՄ և ժամանակակից Ռուսաստանի պատմության մեջ»,- հայտարարել է աղբյուրը:
Ապրիլի 24-ին «Ռոսոբորոնէքպորտի» ղեկավար Ալեքսանդր Միխեևը հաստատել է, որ Թուրքիային ՀՕՊ համակարգերի մատակարարումները կսկսվեն այս տարվա հուլիսին:
Ապրիլի սկզբին Վաշինգթոնը չեղարկել է F-35-ի սարքավորումների Թուրքիա մատակարարումը՝ ռուսական C-400-ի ձեռքբերման պատճառով: Միացյալ Նահանգներում և ՆԱՏՕ-ի անդամ այլ երկրներում մտավախություն ունեն, որ եթե Անկարայի սպառազինության մեջ և՛ C-400, և՛ F-35 լինի, ապա ռուսական ռադարային համակարգերը կսովորեն հայտնաբերել և հետևել ամերիկյան կործանիչներին: