«Առաջին լրատվական»-ի զրուցակիցն է «Հայրենիք և պատիվ» կուսակցության նախագահ Գառնիկ Մարգարյանը։
– Պարոն Մարգարյան, Ռոբերտ Քոչարյանի և բարձրաստիճան այլ պաշտոնյաների գործն արդեն դատարանում է, շուտով կսկսվի դատաքննությունը, ի՞նչ ակնկալիքներ ունեք։
– Լինելով իրավաբան և քիչ թե շատ ծանոթ լինելով քրեադատավարական օրենքներին՝ ասեմ հետևյալը. եթե գործն ուղարկվել է դատարան, ուրեմն նախաքննական մարմինը դատախազությանը ներկայացրել է փաստերը, իսկ դատախազությունը անհիմն ապացույցներով չէր հաստատի քրեական գործը։ Ուզում եմ ասել, որ ես համոզված եմ՝ քրեական գործը հիմնավոր է, կան հիմքեր, եթե չլինեին, չէր հաստատվի ու դատարան չէր ուղարկվի։
Հիմա ի՞նչ սպասել դատարանից։ Ես մեկ անգամ ասել եմ և կրկնեմ, որ դատական համակարգը պետք է հիմնովին փոխվի։ Այսօր դատավորների մեծ մասը, լինելով կաշկանդված, տեսնելով, թե երկրում իրադարձություններն ինչպես են զարգանում հակակոռուպիցոն ոլորտում, կարծես թե սթափ կամ զգուշավոր վիճակում է։ Նրանք կաշխատեն օրենքի շրջանակներում քննություն տանել, ապացույցներով ներկայացված հիմնավորել ու օբյեկտիվ որոշում կայացնել։ Ոչ թե նրա համար, որ դատաիրավական համակարգում հեղափոխություն է տեղի ունեցել, այլ նրանք, լինելով կաշկանդված, համոզված եմ՝ սթափ կմտածեն ու օբյեկտիվ որոշում կկայացնեն։
– Հաշվի առնելով Քոչարյանի և մյուս նախկին պաշտոնյաների ռեսուրսները՝ ի՞նչ սպասել դատարանից դուրս։ Ի՞նչ զարգացումներ են հնարավոր։
– Նրանք չունեն այնպիսի ռեսուրս, որ ինչ-որ խոշոր գործողություններ ծրագրեն։ Մեր բնակչության զգալի մասն իրենց նկատմամբ ատելությամբ է լցված, սոցիալական, բարոյական այս դժվար վիճակն իրենք են ստեղծել, ու հիմա հույս դնեն, որ ժողովուրդը դուրս կգա փողոց, ու ինչ-որ իրադարձություններ կլինեն՝ անիմաստ զբաղմունք է։
Մյուս կողմից էլ՝ սխալ կլինի ասել, որ նրանք ռեսուրս չունեն, ունեն հեռուստաընկերություններ, ունեն ՀՀԿ-ի բեկորները, ճիշտ է՝ քանդվել է, բայց ինչ-որ բեկորներ կան։ Վերջերս մի քանի երիտասարդ են բերել ու ուզում են ցույց տալ, թե շարքերը համալրվել են։ Իհարկե, այնտեղ կան մարդիկ, որոնք բավականին զարգացած ու կիրթ են, և եթե Հանրապետական կուսակցությունից դուրս կամ ինքնուրույն գործեին, այսօր այդ ճահճի մեջ չէին հայտնվի. ես անուններ չեմ տա, բայց կան տղաներ, ում նկատմամբ ես դրական վերաբերմունք ունեմ։ Իսկ ընդհանուր կուսակցությունը ճահճում է՝ Սերժ Սարգսյանի գլխավորությամբ, և հույս փայփայեն, որ վաղը կամ մյուս օրը ինչ-որ բան կանեն՝ անիմաստ է։ Անցած տարվա հեղափոխությունից հետո ասում էին, որ Փաշինյանը երկու ամիս կդիմանա, բայց արդեն մեկ տարի է անցել, և նա շարունակում է կառավարել։ Իհարկե, գուցե բոլորի սպասելիքներն ամբողջությամբ չեն բավարարվել, բայց պետք է հասկանալ, որ կան խանգարող էլեմենտներ՝ առաջին հերթին Հանրապետականն ու նրա բեկորները, «օլիգարխները», ովքեր Քոչարյանի հետ բաժնեմաս ունեն, ովքեր նրանց օրոք բարձրացել են, հովանավորչության ներքո ստեղծել են ոչ թե միլիոններ, այլ միլիարդներ։ Բայց մտածել, որ նրանք կմիավորվեն կամ իրենցից ուժ են ներկայացնում՝ չարաչար կսխալվեն, ճահճում վերջնականապես կխորտակվեն։
– Հնարավո՞ր է նրանք երկրում ապակայունացնող իրավիճակ ստեղծեն։
– Գնալ այդպիսի մեթոդների ու բախումներ հրահրել՝ անիմաստ է, ժողովուրդը դրան չի գնա։ Ատելությունը խորն է և դեռ շատ երկար կտևի, մարդկանց ենթագիտակցույթան մեջ տպավորվել են որպես թալանչիներ ու ավազակներ։ Մարդիկ հիշում են Մարտի 1-ը, Հոկտեմբերի 27-ը, 2004 թվականի ապրիլի 13-ի գիշերը. հիմա մտածել, որ նրանք կգնան բախումների՝ չեմ կարծում։ Գուցե առանձին էպիզոդներ լինեն, որոշ տաքգլուխներ ու վարձկաններ կարող են փողի կամ թմրանյութի ազդեցության տակ ինչ-որ բան անել՝ նրանք լավ փորձ ունեն։ Մարտի մեկի իրադարձությունների ժամանակ ես ամբողջ գիշեր ամբոխի մեջ եմ եղել և տեսել եմ, թե այդ զորքը ինչ է իրականացրել, ջարդող և հարձակվող մասսան ադեկվատ չէր, լուրջ վիճակում չէր. նախկին ռեժիմը միշտ այդպես է վարվել։ Այստեղ ես ուղղակի կոչ կանեի ուժային կառույցներին ուշադիր լինել ու հետևել իրադարձություններին ու թույլ չտալ, որ նման զարգացումներ տեղի ունենան։
Մենք վերջերս ենք քաղխորհրդի նիստ արել ու միանշանակ որոշել ենք, որ որևիցե բախում թույլ չենք տալու, նոր արյուն չպետք է թափվի։ Հիմա, երբ փորձ է արվում նախկին եղածը շտկել ու կարգի բերել, անթույլատրելի է նման զարգացումներ թույլ տալը։
Եթե այդպես լինի, մենք փողոց դուրս կգանք ու թույլ չենք տա որևիցե նման քայլ ձեռնարկել։