Նոյեմբերի 22-ը, որը համընկնում է 1993թ. ազգային արժույթը` դրամը շրջանառության մեջ դնելու օրվա հետ, 2003թ. կառավարության որոշմամբ հայտարարված է որպես բանկային աշխատողի օր: Այսօր ԿԲ 1993-1998թթ նախագահ Բագրան Ասատրյանը, լրագրողների հետ հանդիպման ժամանակ խոսելով դրամի ներդրման մասին, նշեց, որ Հայաստանը ռուբլու գոտուց ամենավերջինը դուրս եկավ, ինչը մի շարք բացասական հետևանքներ ունեցավ: Մասնավորապես, ըստ Բ. Ասատրյանի` եթե ԽՍՀՄ տարիներին և անկախության առաջին տարում Հայաստանում շրջանառվել է մոտավորապես 92-93 մլրդ սովետական և ռուսական ռուբլի, ապա 1993 թ. նոյեմբերի այդ վերջին շաբաթվա ընթացքում, երբ դրամն արդեն ներդրվել էր, Հայաստանում փոխարկվեց 117 մլրդ ռուբլի: Այսինքն` նախկին ԽՍՀՄ մյուս երկրներից, որտեղ ռուբլին արդեն հանվել էր շրջանառությունից, այդ ռուբլին եկել էր Հայաստան, ինչը նաև գնաճային լուրջ ճնշումներ էր առաջացրել մեզ մոտ: «Ինստիտուցիոնալ առումով էլ մենք չունեինք ԿԲ և պահուստներ: Ես կեսկատակ հիշում եմ, որ կառավարությունը որոշակի ապրանքային պաշարներ էր ստեղծել` կարագ, բենզին, որը պետք է շրջանառության մեջ դրվեր դրամի կայունությունը պահպանելու համար: Արտարժութային ռեզերվները այն ժամանակ կառավարությունն էր տնօրինում, ինչը, եթե չեմ սխալվում, ընդամենը 500 հազար ԱՄՆ դոլար էր»,- նշեց Բ. Ասատրյանը