ԱՄՆ Սննդամթերքի ու դեղորայքի վարչությունը նշում է, որ IQOS-ի վաճառքը թույլատրելը համահունչ է հանրային առողջությունը պաշտպանելու իրենց առաքելությանը, քանի որ կարող է օգնել չափահաս ծխողներին ամբողջապես հրաժարվել սիգարետ ծխելուց։
Վերջինս հաստատել է, որ արտադրանքն ավելի քիչ վնասակար նյութեր է արտազատում, ի համեմատ սիգարետի։
Երկու օր է, ինչ ԱՄՆ սննդամթերքի եւ դեղորայքի վարչությունը (US FDA) հայտարարել է, որ թույլ կտա Ֆիլիպ Մորրիս ընկերությանը Միացյալ Նահանգներում վաճառել IQOS ծխախոտի տաքացման համակարգը։ Ինչպես նշում է CNBC լրատվականն իր անդրադարձում, սա խոշոր հաղթանակ է ծխախոտի հսկայի համար, քանի որ Ֆիլիպ Մորրիսը իր ապագան կառուցում է ոչ թե սիգարետի, այլ այլընտրանքային արտադրատեսակների վրա։
Ավելի քան երկու տարի տևած ուսումնասիրության արդյունքում Ամերիկայի FDA-ը որոշեց, որ սարքավորումը ԱՄՆ շուկայում վաճառվելու համար «համապատասխանում է հանրային առողջության պահպանման սկզբունքին», քանի որ IQOS-ն արտազատում է «վնասակար որոշ նյութերի ավելի ցածր կամ ավելի քիչ մակարդակներ, քան սիգարետը»:
Այսպիսով, FDA-ը ուսումնասիրել է արտադրող ընկերության կողմից ներկայացված հայտը, վերանայել առկա գրականությունն ու այլ աղբյուրները, և գիտական գնահատման արդյունքում պարզել, որ IQOS ծխախոտի տաքացման համակարգի արտազատած գոլորշին պարունակում է ավելի քիչ թունավոր քիմիական նյութեր, քան սիգարետի ծուխը, իսկ հայտնաբերված վնասակար նյութերի մեծ մասը ավելի քիչ մակարդակով է առկա, քան սիգարետի ծխում:
IQOS-ը մարդու օրգանիզմ է մատակարարում գրեթե նույնքան նիկոտին, որքան սիգարետը, ինչը հավանական է դարձնում այն, որ IQOS-ի օգտատերերը կկարողանան ամբողջությամբ հրաժարվել սիգարետից ու անցնել միմիայն IQOS-ի օգտագործմանը
FDA ծխախոտային արտադրանքի կենտրոնի տնօրենը նշել է, որ չնայած արտադրատեսակի վաճառքը թույլատրելը չի նշանակում, որ այն անվտանգ է, դիմումի վերանայման գործընթացի շրջանակներում համոզվել են, որ արտադրատեսակի վաճառքը համընթաց է հանրային առողջության պահպանմանը՝ հաշվի առնելով թե՛ ռիսկերն ու թե՛ օգուտները բնակչության համար՝ ներառյալ այն, թե ինչպես կարող է արտադրանքը ազդել երիտասարդների կողմից նիկոտինի և ծխախոտի օգտագործման վրա, բայց նաև այն, թե ինչ պոտենցիալ ունի արտադրանքը չափահաս ծխողներին սիգարետ ծխելուց ամբողջությամբ հեռու պահելու առումով։
Ալտրիա Գրուպը, որը ներկայումս ԱՄՆ-ում զբաղվում է Marlboro սիգարետի վաճառքով, կդառնա նաև IQOS-ի ներկայացուցիչ՝ Ֆիլիպ Մորրիս Ինթերնեյշնլի հետ ունեցած լիցենզային պայմանագրի շրջանակներում:
Ալտրիայի նախագահ և գլխավոր գործադիր տնօրեն Հովարդ Ուիլդը հայտարարել է, որ արտադրատեսակն առաջինը վաճառքի է հանվելու Ատլանտա նահանգում:
Ֆիլիպ Մորրիս Ինթերնեյշնլի գործադիր տնօրեն Անդրե Կալանթզոպուլոսը FDA-ի որոշումը որակել է որպես նշանակալի իրադարձություն․ «Ֆիլիպ Մորրիսում բոլորս էլ պատրաստակամ ենք սիգարետը առանց այրման աշխատող բարդ տեխնոլոգիայի և ինտենսիվ գիտական գնահատման վրա հիմնված այլընտրանքներով փոխարինելու», – ասաց նա:
Ի տարբերություն սիգարետի, որն աշխատում է այրման հենքով, IQOS սարքերը տաքացնում են հատուկ ձևով մշակված ծխախոտի գլանակները, ինչի արդյունքում առաջանում է նիկոտին պարունակող գոլորշի: IQOS-ը տարբերվում է էլեկտրոնային սիգարետից․ վերջիններս ծխախոտ չեն պարունակում։
