Գլխավոր դատախազ Արթուր Դավթյանը լրագրողներին հայտնել է, որ Գագիկ Ծառուկյանի դեմ ձեռնարկատիրությունն ու պատգամավորությունը համատեղելու հիմքով քրգործ հարուցելու ՔՈ կուսակցության դիմումը ուղարկել է Հատուկ քննչական ծառայություն: ՀՔԾ այս գործը կարող է հավակնել ունենալու ընդհուպ պատմական նշանակություն Հայաստանի համար: Ոչ այն իմաստով, իհարկե, որ կարող է քրգործ հարուցվել ԲՀԿ նախագահ Գագիկ Ծառուկյանի դեմ: Խնդիրը բացարձակապես դա չէ, և այդպիսի զարգացումը խորքային առումով որևէ կապ չունի այն հիմնարար խնդրի հետ, որին տվյալ պարագայում բախվում է հանրությունը:
Խնդիրը նախևառաջ նախադեպ ստեղծելն է, երբ իրավապահ կառույցը կարող է քննել Սահմանադրության այդօրինակ խախտումը՝ պարզելու համար, թե արդյոք բիզնեսն ու քաղաքականությունը սերտաճա՞ծ են: Այդպիսի նախադեպը ինքնին կարևոր իրավաքաղաքական մշակույթ է, որ անհրաժեշտ է Հայաստանում համակարգային և մենթալ փոփոխության ճանապարհին:
Դրանից բացի, կախված արդեն կոնկրետ արդյունքից, կարող է ստեղծվել այլ նախադեպ, երբ քաղաքական հետադիմության վկայություն հանդիսացող խնդիրը կարող է լուծվել ոչ թե քաղաքական հրամայականների, այլ իրավական ճանապարհով՝ այդ թվում և կոնկրետ մեղադրվող անձին տալով իր շահերը պաշտպանելու հնարավորություն: Եթե այդ մեխանիզմն աշխատի, սա անկասկած, անկախ քննության ելքից, բերելու է բոլոր սուբյեկտների վարքագծի փոփոխության, որոնք հաշվի են առնելու իրավական կառույցների համարժեք վարքագծի առկայությունը: Կհանգեցնի այդ ամենը Ծառուկյանին մանդատից զրկելուն, թե ոչ՝ սա համաձայնեք, որ խոշոր հաշվով երկրորդական հարց է: Ավելին, զուտ այդ տեսանկյունից մանդատը թողնելն ու լիովին բիզնես գործունեությամբ զբաղվելը հանրությունից ավելի անհրաժեշտ է հենց Գագիկ Ծառուկյանին:
Այդ կապակցությամբ տեղեկություն է հրապարակվել մամուլում, որ Ծառուկյանի մանդատի հարցում, այսպես ասած, վճռական քայլերի դեպքում, որ կարող է անել իշխանությունը, ԲՀԿ ամբողջ խմբակցությունը մտադիր է վայր դնել մանդատն ու ստեղծել քաղաքական ճգնաժամ՝ արտահերթ ընտրության գնալու համար: Ինտրիգն այն է, որ այդպիսով կառաջանա խորհրդարանում երրորդ ուժի, նաև մեկ-երրորդ ընդդիմության բացակայություն, ինչը կառաջացնի նոր խորհրդարան ձևավորելու անհրաժեշտություն:
Այստեղ իհարկե նախ հարց է, թե արդյո՞ք ամբողջ ԲՀԿ-ն է պատրաստ վայր դնել մանդատները, այսինքն՝ նաև բոլոր նրանք, ովքեր նախընտրական ցուցակում էին, սակայն չի հասել մանդատի հերթը: Սա էլ իր հերթին հարց է առաջացնում, թե ընդհանրապես ազդեցության ի՞նչ շերտերից է կազմված ԲՀԿ-ն:
Այն, որ նախկին համակարգում իշխանության տարբեր թևեր ունեին իրենց բաժինը կամ սեգմենտը, այդ թվում՝ Սերժ Սարգսյանը, ակնառու էր հատկապես 2017 թվականի խորհրդարանի ընտրությանը: Բայց ինչպիսին է վիճակն այդ առումով թավշյա հեղափոխությունից հետո: Որքան էլ Գագիկ Ծառուկյանն այժմ ամբողջապես վերահսկում է կուսակցությունը, դրա քաղաքական վարքագիծը:
Սրան զուգահեռ մեկ այլ հարց է այն, թե թավշյա հեղափոխությունից սկսած մինչ այժմ պայմանավորվածությունների ինչ համակարգում են վարչապետ Փաշինյանն ու Ծառուկյանը, որոնք հանդիպել են գրեթե բոլոր հանգուցային փուլերում:
Պայմանավորվածությունները կատարվո՞ւմ են, և արդյո՞ք կարող է դրանց շրջանակում լինել նաև մանդատի հարցը՝ հաշվի առնելով և այն, որ խոշոր հաշվով Գագիկ Ծառուկյանի համար կարող է խնդիր լինել ԲՀԿ-ն, այսպես ասած, միանգամից թողնելը՝ հենց հնարավոր այլ պայմանավորվածությունների համատեքստում: Իսկ թողնել մանդատը՝ նշանակելու է թողնել ԲՀԿ-ն: Դա էլ իր հերթին նշանակելու է, որ կուսակցությունն էլ թողնվելու է ինքնահոսի: Սա էլ իր հերթին խնդիրներ է առաջացնելու բոլոր նրանց համար, ովքեր որևէ կարգավիճակով ներգրավված էին ֆորմատում:
Այդ համատեքստում պետք չէ բացառել, որ մանդատները համընդհանուր վայր դնելու հանգամանքը ճնշում է հենց Գագիկ Ծառուկյանի վրա՝ կուսակցության ներսից, որպեսզի նա չմտածի մանդատը թողնելու մասին՝ դրանով լուծելով քաղաքականության ծանր բեռից իր ազատվելու հարցը, միաժամանակ հարցեր առաջացնելով կուսակցությունում ներգրավված սուբյեկտների համար:
Լուսանկարը՝ Armeniasputnik-ի