Հայաստանի բանկային համակարգը ինստիտուցիոնալ առումով ամենակայացածն ու եվրոպական չափանաիշներին ամենահամապատասխանողն է, քան թե տնտեսության ցանկացած այլ ինստիտուտ: Այս մասին այսօր լրագրողների հետ հանդիպման ժամանակ նշեց ԿԲ 1993-1998թթ նախագահ Բագրատ Ասատրյանը: «Վերջին 15 տարիներին բանկային համակարգի զարգացման տեմպերը միշտ եղել են ավելի բարձր, քան տնտեսության զարգացման տեմպերը: Այսօր մեր բանկային համակարգը ապրում է միջազգային չափանիշներով, հայաստանյան միջին բանկը ձեզ կարող է մատուցել այն ծառայությունները, որոնք մատուցում են եվրոպական բանկերը: Տեխնիկական տեխնոլոգիական զարգացումներ կան: 1994-ին, օրինակ, փոխանցում բառը անհեթեթ էր: Կարգավորումների տեսակետից ևս բավականին հասուն համակարգ ունենք, վերահսկողության տեսակետից էլ վերջին շրջանում ոչ այնքան ցանկալի միտումներ են առաջ գալիս, բայց ամեն դեպքում այն բավականին բարձր մակարդակի վրա է, հատկապես Հայաստանի այլ վերահսկող մարմինների համեմատ»,- ասաց Բ. Ասատրյանը: Սակայն, ըստ նրա, բանկային համակարգի դերը տնտեսության մեջ չափազանց փոքր է շարունակում մնալ, իսկ համակարգի զարգացմանը խոչընդոտում է հատկապես ստվերային տնտեսությունը: Ըստ Ասատրյանի` մեր բանկային համակարգը ըստ էության «տնտեսության կողքը խաղաղ գոյատևելու սկզբունքն է ընտրել»
