Ինչպես արդեն տեղեկացրել ենք, հայազգի բռնցքամարտիկ Արթուր Աբրահամը երեկ պարտության է մատնել 32-ամյա բռնցքամարտիկ Ռոբերտ Շտիգլիցին ու վերադարձրել սուպերմիջին քաշային կարգում WBO վարկածով աշխարհի չեմպիոնի կոչումը: Արթուրը պատասխանել է «Առաջին լրատվական»-ի հարցերին:
-Արթուր, նախևառաջ շնորհավորում ենք Ձեզ գեղեցիկ հաղթանակի կապակցությամբ: Երկա՞ր էիք նախապատրաստվել այս մենամարտին, ինչպե՞ս կմեկնաբանեք այն:
-Ծանր մենամարտ էր երկուսիս համար էլ: Նա էլ էր պայքարում մինչև արյան վերջին կաթիլը, ես էլ: Երկրպագուների համար դիտարժան մենամարտ ստացվեց, այն ձանձրալի չէր: Ինձ համար ամենակարևորը հաղթանակն էր: Այս անգամ երկար էի նախապատրաստվել մենամարտին: Մոտ 10 շաբաթ տուն չէի գնացել: Հավաքներ էի անցկացնում: Դժվար էր, բայց երբ հաղթում ես, ամեն ինչ մոռանում ես:
-Վստա՞հ էիք, որ կհաղթեք:
-Այո: Այլ արդյունքի մասին չէի մտածում:
-Շտիգլիցի դեմ 3-րդ մենամարտն էր: Եթե նա ցանկանա, կմենամարտե՞ք 4-րդ անգամ:
-Ես պատրաստ եմ նորից մենամարտել: Ոչ մի խնդիր չկա:
-Ո՞րն է լինելու չեմպիոնի հաջորդ քայլը:
-Մայիսի 31-ին կրկին մենամարտելու եմ: Հիմա չեմ կարող խոսել ծրագրերիս մասին, քանի որ դրանք դեռ կարող են փոխվել: Մենամարտից հետո դեռ մենեջերների հետ չեմ խոսել: Խոսակցությունից հետո պարզ կլինի:
-Ծանր մենամարտից հետո ինչպե՞ս և որտե՞ղ է անցնելու վերականգնման գործընթացը:
-Այս անգամ ուզում եմ վերականգնվել Սինգապուրում:
-Ե՞րբ կլինեք Հայաստանում:
-Դեռ կոնկրետ չեմ կարող ասել: Այստեղ մի քանի հանդիպումներ ունեմ լրագրողների հետ, տարբեր հեռուստաընկերություններ են հրավիրել: Մի քանի օր կտևի դա, հետո երևի կգամ Հայաստան:
-2014-ը հաջող է մեկնարկել Ձեզ համար: Ի՞նչ ծրագրեր ունեք:
-Ամենակարևոր ծրագիրս այս տարի գոտին պահելն է, որ տիտղոսը ձեռքից բաց չթողնեմ:
-Եվ վերջում ևս մեկ անգամ մեր ընթերցողների, բոլոր հայ մարզասերների անունից շնորհավորում ենք Ձեզ` գերազանց հաղթանակի կապակցությամբ:
-Շնորհակալություն: Ես էլ շնորհակալ եմ ամբողջ հայ ազգից ու Ձեզնից:
