«Միացյալ Նահանգներն այս պատմական դեպքերը, պատմական իրողությունը չի ժխտում, և այն, ինչ տեղի է ունեցել 1915 թվականին, դա 20-րդ դարի խոշորագույն վայրագություններից մեկն է: Եվ մեզ շարունակում է ոգևորել այն տոկունությունը, որ մենք տեսնում ենք հայ ժողովրդի մոտ»,- այս մասին այսօր Հայոց ցեղասպանության զոհերի Ծիծեռնակաբերդի հուշահամալիրում ասել է Հայաստանում ԱՄՆ դեսպան Լին Թրեյսին։
Թեմայի շուրջ «Առաջին լրատվական»- ի հետ քննարկմանը մասնակցեցին միջազգայնագետ Գրետա Ավետիսյանը, վերլուծաբան Հակոբ Բադալյանը, պատմաբան Դավիթ Թինոյանը:
«ԱՄՆ դեսպանի հայտարարությունից ժամեր անց տարածվեց Թրամփի ուղերձը, որտեղ ԱՄՆ նախագահը նույնպես աշխարհասփյուռ հայության տոկունության մասին է խոսում: Թրամփն օգտագործել է Մեծ եղեռն եզրույթը: Նա նաև խոսել է այն մասին, որ խոստանում է սխալներից հետևություն անել և թույլ չտալ նման ողբերգության կրկնություն. սա ինչ-որ առումով պատասխանատվության մասին ակնարկ է,- նշեց Հ. Բադալյանը՝ հավելելով, որ Հայկական հարցը շարունակում է մնալ համաշխարհային քաղաքականության օրակարգի առանցքային հարցերից մեկը, և մենք, որպես պետություն, պետք է կարողանանք օգտագործել հանգամանքները՝ այդ հարցի դերը բարձրացնելու գործում»:
Հայոց ցեղասպանության ճանաչման գործում դոմինանտը մնում է Միացյալ Նահանգների դերը: «ԱՄՆ-ից այսօր շատ բան է կախված: Ամերիկյան կողմի տեսակետը այս հարցի շուրջ կարող է վճռորոշ դեր ունենալ Հայկական հարցի հաջորդ փուլին անցնելու գործում»- ընդգծեց Դ. Թինոյանը:
Գ. Ավետիսյանը նկատեց, որ Դ. Թրամփը ԱՄՆ այն միակ նախագահն է, որն իր նախընտրական շրջանում Հայոց ցեղասպանությունը ճանաչելու խոստում չտվեց, և այդ առումով անտրամաբանական է դրական տեղաշարժ ակնկալել: «Բայց հաշվի առնելով թուրք-ամերիկյան հարաբերությունների լարվածությունը՝ գուցեև Հայոց ցեղասպանության հարցը ԱՄՆ-ի ձեռքին գործիք դառնա Թուրքիայի վրա ճնշում գործադրելու համար՝ ակնարկելով, որ կարող է ճանաչել Ցեղասպանությունը: Բայց դեռևս ճանաչելու առումով ակնկալիքներ չենք կարող ունենալ»,- նշեց միջազգայնագետը:
Նախկին իշխանությունը դժգոհում է, որ նոր իշխանությունը միջազգային հարթակները չի օգտագործում Հայոց ցեղասպանության ճանաչման գործում. անդրադառնալով այս դիտարկմանը՝ Գ. Ավետիսյանը նշեց, որ իշխանությունները դեռևս նոր են ստանձնում իրենց պարտավորությունները, պարտականությունները, և նրանք առաջնային և գերակա խնդիրն են համարում Ղարաբաղյան հակամարտության գործընթացում առաջընթաց գրանցելը, բայց սա չի նշանակում, որ Հայոց ցեղասպանության ճանաչման գործընթացը մղվել է երրորդական-չորրորդական պլան. «Թե՛ ՀՀ վարչապետը, թե՛ արտգործնախարարը հայտարարեցին, որ Հայոց ցեղասպանության ճանաչման գործընթացը գերակայությունների շրջանակում է»:
Մանրամասն՝ տեսանյութում: